અમદાવાદ શહેરના પૂર્વ વિસ્તાર ગણાતા ઓઢવ વિસ્તારમાં મોડી રાત્રે એક સનસનાટીભરી હત્યાની ઘટના સામે આવી છે. ઓઢવ ગામમાં આવેલા શિવમ્ ઇન્દિરા નગરના આવાસમાં પાણીની ટાંકી નજીક જાહેરમાં 31 વર્ષીય અજીતકુમાર ઠાકોર નામના યુવક પર જીવલેણ હુમલો કરવામાં આવ્યો હતો. મૃતક અજીતકુમાર પોતાના કાકા સાથે શક્તિ ડેકોરેશન નામના વ્યવસાયમાં કામ કરીને પરિવારનું ગુજરાન ચલાવતો હતો.
છેડતીની જૂની અદાવતમાં 3 સગીરોએ રચ્યું કાવતરું
પોલીસ ફરિયાદમાં દર્શાવેલી વિગતો મુજબ આ હત્યાકાંડ પાછળ પૂર્વ આયોજિત અદાવત જવાબદાર હોવાનું સામે આવ્યું છે. અગાઉ યુવતીની છેડતી બાબતે થયેલા ઝઘડાની રંજિશ રાખીને એક જ એક્ટિવા બાઈક પર આવેલા ત્રણ સગીર વયના કિશોરોએ અજીતકુમારને આંતર્યો હતો. ત્રણેય સગીર આરોપીઓએ ભેગા મળીને પહેલા યુવકને દંડા, લાતો અને ફેંટો વડે ઢોર માર માર્યો હતો અને ત્યારબાદ તીક્ષ્ણ ચપ્પુ વડે ગરદન, પેટ અને છાતી જેવા નાજુક ભાગો પર આડેધડ છરીના ઘા ઝીંકી દીધા હતા.
ઓઢવ પોલીસે વધુ તપાસ હાથ ધરી
હુમલામાં ગંભીર રીતે રક્તરંજિત થયેલા અજીતકુમારને આસપાસના લોકો દ્વારા તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા હતા, જ્યાં ફરજ પરના ડોક્ટરોએ તેમને મૃત જાહેર કર્યા હતા. બનાવ અંગેની જાણ થતાં જ ઓઢવ પોલીસનો કાફલો ઘટનાસ્થળે દોડી આવ્યો હતો. ઓઢવ પોલીસે હત્યાનો ગંભીર ગુનો નોંધીને ગુનામાં સંકળાયેલા ત્રણેય સગીર આરોપીઓની અટકાયત કરવા અને કાયદેસરની કાર્યવાહી હાથ ધરવા ચક્રો ગતિમાન કર્યા છે.