અમદાવાદ શહેરના કોટ વિસ્તારમાં આવેલ દરિયાપુર વિસ્તારમાં ગેરકાયદેસર બાંધકામો સામે અમદાવાદ મ્યુનિસિપલ કોર્પોરેશન (AMC) દ્વારા મોટું ડિમોલેશન ઓપરેશન હાથ ધરવામાં આવ્યું છે. દરિયાપુર વિસ્તારની પોપટિયા વાડમાં ખડકી દેવામાં આવેલા અનધિકૃત રહેણાંક કોમ્પ્લેક્સ પર બુલડોઝર ફેરવીને ગેરકાયદે બાંધકામો જમીનદોસ્ત કરી દેવામાં આવ્યા છે. તંત્રની આ અચાનક અને કડક કાર્યવાહીથી ગેરકાયદે બાંધકામ કરનારા તત્વોમાં ભારે ફફડાટ વ્યાપી ગયો છે.
મંજૂરી વગર ઊભા કરાયા હતા રહેણાંક કોમ્પ્લેક્સ
તપાસ દરમિયાન સામે આવ્યું હતું કે પોપટિયા વાડ વિસ્તારમાં કોર્પોરેશનની કોઈ પણ પ્રકારની પૂર્વ પ્લાન મંજૂરી કે પરવાનગી લીધા વિના જ મસમોટા રહેણાંક કોમ્પ્લેક્સ ઊભા કરી દેવામાં આવ્યા હતા. મ્યુનિસિપલ તંત્ર દ્વારા અગાઉ નોટિસો આપવા છતાં બાંધકામ દૂર કરવામાં ન આવતાં આખરે એસ્ટેટ વિભાગની ટીમે સ્થળ પર પહોંચીને જેસીબી અને ક્રેનની મદદથી ગેરકાયદે બાંધકામો તોડી પાડવાની કાર્યવાહી હાથ ધરી હતી.
ચુસ્ત પોલીસ બંદોબસ્ત વચ્ચે કામગીરી પૂર્ણ
ડિમોલેશનની કામગીરી દરમિયાન કોઈ અપ્રિય બનાવ ના બને અથવા સ્થાનિકો તરફથી કોઈ વિરોધ ન થાય તે માટે અગાઉથી જ સ્થાનિક પોલીસનો ચુસ્ત બંદોબસ્ત ગોઠવી દેવામાં આવ્યો હતો. પોલીસ કાફલાની હાજરીમાં તંત્ર દ્વારા સુચારુ રૂપે આખી કાર્યવાહી પૂર્ણ કરવામાં આવી હતી. કોર્પોરેશનના અધિકારીઓએ સ્પષ્ટ ચેતવણી આપી છે કે શહેરમાં મંજૂરી વગર થતાં આવા ગેરકાયદે બાંધકામો સામે આવનારા દિવસોમાં પણ આ જ રીતે આકરાં પગલાં ચાલુ રહેશે.