અમદાવાદ શહેરમાં ટ્રાફિક નિયંત્રણ અને આયોજનના નામે વહીવટી તંત્ર દ્વારા લેવાતા નિર્ણયો અવારનવાર વિવાદોમાં ઘેરાતા હોય છે. તાજેતરમાં મકરબા બ્રિજ પાસે તંત્રની કામગીરી સામે નાગરિકો અને વાહનચાલકોમાં ભારે રોષ જોવા મળી રહ્યો છે. અગાઉ કરેલી ભૂલો કે ખામીઓને સુધારવાના બદલે તંત્ર દ્વારા ત્યાં વધુ એક નવો પ્રયોગ આદરવામાં આવ્યો છે, જેના કારણે રાહત મળવાના બદલે મુશ્કેલીઓ વધુ વિકટ બની રહી છે. વાહનચાલકો કટાક્ષ કરી રહ્યા છે કે તંત્ર પોતાની જૂની ભૂલોમાંથી શીખવા તૈયાર નથી અને જનતાને હાલાકીમાં મૂકતા નવા નિર્ણયો થોપી રહી છે.

કૅપ્સ્યુલ સિસ્ટમ બાદ હવે ચાર રસ્તા પર ટ્રાફિક સિગ્નલની કામગીરી

મળતી વિગતો મુજબ અગાઉ મકરબા બ્રિજ પાસે કૅપ્સ્યુલ સિસ્ટમ લાગુ કરવામાં આવી હતી, જેના કારણે વાહનચાલકોએ પોતાના ગંતવ્ય સ્થાન સુધી પહોંચવા માટે 200 થી 300 મીટર જેટલું વધારાનું અંતર કાપવું પડતું હતું અને ભારે અગવડ વેઠવી પડતી હતી. આ પ્રયોગ ફલોપ સાબિત થયા બાદ હવે તંત્ર દ્વારા ચાર રસ્તા પર નવા ટ્રાફિક સિગ્નલ લગાવવાની કામગીરી શરૂ કરી દેવામાં આવી છે. સ્થિતિ એવી છે કે બ્રિજ ઉતરતાની સાથે જ વાહનચાલકોએ સીધા સિગ્નલ અને ટ્રાફિકનો સામનો કરવો પડશે, જેના કારણે બ્રિજ પર જ લાંબો ટ્રાફિક જામ થઈ જવાની પૂરેપૂરી શક્યતા છે.

અચાનક લેવાયેલા નિર્ણયોથી વાહનચાલકોમાં હાલાકી અને આક્રોશ

ટ્રાફિકના યોગ્ય આયોજન વિના અચાનક લેવામાં આવતા આવા નિર્ણયોના કારણે રોજબરોજ અપડાઉન કરતા નોકરીયાતો અને સ્થાનિક રહીશો મુશ્કેલીમાં મુકાયા છે. પીક અવર્સ (Peak Hours) દરમિયાન આ સિગ્નલ શરૂ થવાથી વાહનચાલકો કલાકો સુધી ટ્રાફિકમાં ફસાઈ શકે તેવી ભીતિ સેવાઈ રહી છે. જનતાના પ્રશ્નો અને સુવિધાને ધ્યાનમાં રાખ્યા વગર મનસ્વી રીતે થતા આવા પ્રયોગો સામે વાહનચાલકોમાં તંત્ર વિરુદ્ધ ભારે રોષ જોવા મળી રહ્યો છે અને તાત્કાલિક યોગ્ય ટ્રાફિક મેનેજમેન્ટ ગોઠવવાની માંગ ઉઠી છે.

આ પણ વાંચો : Jamnagarમાં સગીરા પર દુષ્કર્મ આચરનાર બે હેવાન ઝડપાયા, લાલચ અને ધાકધમકી આપી ગુજાર્યો હતો અત્યાચાર!