અમદાવાદ શહેરમાં મિલકત સંબંધી ગુનાઓ અને ચોરીની ઘટનાઓને ડામવા માટે પોલીસ દ્વારા સઘન અભિયાન ચલાવવામાં આવી રહ્યું છે. દરમિયાન, એલસીબી ઝોન-7ની ટીમને મળેલી ચોક્કસ બાતમીના આધારે વેજલપુર પોલીસ સ્ટેશન વિસ્તારમાં નોંધાયેલા ઘરફોડ ચોરીના અનડિટેક્ટ ગુનાનો સફળતાપૂર્વક ભેદ ઉકેલી નાખવામાં આવ્યો છે. પોલીસે કુખ્યાત ‘ફતેવાડી ગેંગ’ના 4 સાગરીતોને ઝડપી પાડવામાં મોટી સફળતા મેળવી છે.

પકડાયેલા આરોપીઓની વિગતો અને ગુનાહિત ઇતિહાસ

એલસીબી ઝોન-7ની ટીમે બાતમીના આધારે કાર્યવાહી કરીને ચારેય આરોપીઓને દબોચી લીધા હતા. પકડાયેલા આરોપીઓમાં: 1. ફારૂક ઉર્ફે પેઇન્ટર, 2. સરફરાજ ઉર્ફે ઇરફાન, 3. શેરઅફઝલ ઉર્ફે બાબા અને 4. ફરહાનખાન. આ ચારેય આરોપીઓ પૈકી બે શખ્સોનો અગાઉ પણ ગંભીર ગુનાહિત ઇતિહાસ પોલીસ ચોપડે નોંધાયેલો હોવાનું સામે આવ્યું છે.

1.64 લાખનો મુદ્દામાલ અને ઓટોરિક્ષા જપ્ત

આરોપીઓ પાસેથી રાત્રિના સમયે ચોરી કરવામાં આવેલો સામાન જપ્ત કરવામાં આવ્યો છે, જેમાં ઘડિયાળ, એરબડ્સ, ઇમિટેશન હાર તેમજ રોકડ રકમ સહિત કુલ રૂ.1.64 લાખનો મુદામાલ પોલીસે કબજે કર્યો છે. આ ઉપરાંત, ચોરીના ગુનાને અંજામ આપવા માટે ઉપયોગમાં લેવામાં આવેલી ઓટોરિક્ષા પણ પોલીસે જપ્ત કરી લીધી છે. વેજલપુર પોલીસ દ્વારા તમામ આરોપીઓ વિરુદ્ધ કાયદેસરની કાર્યવાહી હાથ ધરીને વધુ તપાસ શરૂ કરવામાં આવી છે.

ગુજરાતના વધુ સમાચાર વાંચવા માટે ક્લિક કરો