અમદાવાદ શહેરના સાબરમતી વિસ્તારમાંથી માસૂમ બાળકના થયેલા અપહરણના ચકચારી કેસમાં તપાસ કરી રહેલી ક્રાઈમ બ્રાન્ચને મોટી સફળતા અને મહત્વની માહિતી હાથ લાગી છે. તપાસ દરમિયાન સામે આવ્યું છે કે મુખ્ય સૂત્રધાર જીનલ નામની યુવતી અગાઉ નર્સ તરીકે કામ કરતી હતી. તબીબી ક્ષેત્ર સાથે સંકળાયેલી હોવાના કારણે તે હોસ્પિટલ અને બાળ સુરક્ષા અંગેની બાબતોથી વાકેફ હતી, જેનો ઉપયોગ તેણે આ ગુનામાં કર્યો હોવાનું પ્રાથમિક તપાસમાં બહાર આવ્યું છે.
મોંઘી લાઈફસ્ટાઈલ જીવવા રચેલું કાવતરું
પોલીસની પ્રાથમિક પૂછપરછ અને તપાસમાં જાણવા મળ્યું છે કે આરોપી જીનલ અત્યંત મોંઘી લાઈફસ્ટાઈલ અને આલીશાન જીવન જીવવાની શોખીન હતી. પોતાની મોજશોખ અને આર્થિક જરૂરિયાતો પૂરી કરવા માટે તેણે આ માસૂમ બાળકના અપહરણનું ભયાનક કાવતરું રચ્યું હોવાની આશંકા છે. ઘટના બાદ પોલીસને ચકમો આપવા માટે તેણે વિગતવાર પ્લાનિંગ કર્યું હતું.
3 રાજ્યોમાં ક્રાઈમ બ્રાન્ચની ટીમોનું સર્ચ ઓપરેશન
બાળકને સુરક્ષિત રીતે મુક્ત કરાવવા અને આરોપીઓને ઝડપી પાડવા માટે અમદાવાદ ક્રાઈમ બ્રાન્ચની અલગ-અલગ ટીમો રાજ્ય બહાર તપાસમાં જોતરાઈ છે. હાલમાં દેશના 3 અલગ-અલગ રાજ્યોમાં ક્રાઈમ બ્રાન્ચની ટીમો સઘન સર્ચ ઓપરેશન અને લોકેશન ટ્રેસિંગની કામગીરી કરી રહી છે. પોલીસે ટૂંક સમયમાં જ બાળકને હેમખેમ શોધી કાઢવાનો અને આરોપીઓને જેલહવાલે કરવાનો દાવો કર્યો છે.