અમદાવાદ શહેરમાં નશાકારક પદાર્થોની હેરાફેરી વિરુદ્ધ ચલાવવામાં આવી રહેલી ઝુંબેશ અંતર્ગત રામોલ પોલીસ સ્ટેશનની ટીમે એક સફળ ઓપરેશન પાર પાડ્યું છે. પોલીસને મળેલી બાતમીના આધારે ઓરિસ્સાથી મોરબી તરફ મોકલવામાં આવી રહેલો ગાંજાનો મસમોટો જથ્થો ઝડપી પાડવામાં આવ્યો છે. રામોલ પોલીસે વોચ ગોઠવીને તપાસ હાથ ધરી હતી અને આ ગેરકાયદેસર હેરાફેરીમાં સંડોવાયેલા મુખ્ય સપ્લાયરને ઝડપી લેવામાં મોટી સફળતા મેળવી છે.

આંતરરાજ્ય ડ્રગ્સ નેટવર્ક સામે પોલીસનો સપાટો

પોલીસ દ્વારા કરવામાં આવેલી સઘન તપાસ દરમિયાન વાહનમાંથી 16 કિલોગ્રામથી વધુનો શંકાસ્પદ ગાંજાનો જથ્થો મળી આવ્યો હતો, જેને પોલીસે તરત જ કબ્જે કર્યો છે. આ માદક પદાર્થની હેરાફેરી કઈ રીતે થતી હતી અને તેના મૂળમાં કોણ-કોણ સંકળાયેલું છે તે અંગે ઊંડાણપૂર્વક તપાસ શરૂ કરવામાં આવી છે. પોલીસે ઓરિસ્સાના મુખ્ય ગાંજા સપ્લાયરની ધરપકડ કરી લીધી છે અને આ નેટવર્ક સાથે જોડાયેલા અન્ય શખ્સો સામે પણ કાયદાકીય સકંજો  કસવામાં આવ્યો છે.

NDPS એક્ટ હેઠળ ગુનો નોંધી સઘન તપાસ શરૂ

 પ્રાથમિક પૂછપરછમાં આ ગાંજાનો જથ્થો ઓરિસ્સાથી મોરબી તરફ મોકલવામાં આવી રહ્યો હોવાનું સ્પષ્ટ થયું છે. મોરબી ખાતે આ જથ્થો કોને પહોંચાડવાનો હતો અને કયા પેડલર તેને રિસીવ કરવાના હતા તે અંગેની કડીઓ મેળવવા માટે રામોલ પોલીસે વિશેષ તપાસના ચક્રો ગતિમાન કર્યા છે. પકડાયેલા આરોપી વિરુદ્ધ NDPS એક્ટ હેઠળ ગુનો નોંધીને વધુ તપાસ હાથ ધરવામાં આવી છે, જેથી ડ્રગ્સ સપ્લાય કરતી આંતરરાજ્ય ગેંગના અન્ય રાઝ પણ બહાર આવી શકે. 

ગુજરાતના વધુ સમાચાર વાંચવા માટે ક્લિક કરો