ગુજરાત સહિત દેશના 22 જેટલા રાજ્યોના નેશનલ કેડેટ કોર્પ (NCC) ના આશરે 200 જેટલા ઉત્સાહી કેડેટ્સ દ્વારા NCC નિદેશાલય, ગુજરાતના નેજા હેઠળ અમદાવાદ ખાતે કઠિન કવાયત અને સંકલિત તાલીમનો પ્રારંભ કરવામાં આવ્યો છે. આ કેડેટ્સ BSF, CISF, SSB અને અન્ય કેન્દ્રીય સશસ્ત્ર પોલીસ દળો (CAPF) ની ટુકડીઓ સાથે કદમતાલ મિલાવીને માર્ચ પાસ્ટની વિશેષ તાલીમ મેળવી રહ્યા છે. 10 દિવસની આ સઘન તાલીમ પૂર્ણ કર્યા બાદ અમદાવાદના આ કેડેટ્સ 31 ઓક્ટોબર 2026 ના રોજ ગુજરાતના વિશ્વપ્રસિદ્ધ પ્રવાસન સ્થળ કેવડિયા ખાતે યોજાનાર ‘રાષ્ટ્રીય એકતા દિવસ’ ની ઉજવણીમાં ભાગ લેશે.
સરદાર પટેલની જન્મજયંતિની ભવ્ય ઉજવણી
ભારતના લોખંડી પુરુષ સરદાર વલ્લભભાઈ પટેલની જન્મજયંતિ નિમિત્તે કેવડિયા ખાતે પ્રતિષ્ઠિત ‘સ્ટેચ્યુ ઓફ યુનિટી’ ની પૃષ્ઠભૂમિમાં રાષ્ટ્રીય એકતા દિવસની ભવ્ય ઉજવણી કરવામાં આવશે. સરદાર સાહેબની દૂરંદેશી અને અડગ નિશ્ચયે દેશના રાજકીય એકીકરણમાં આપેલા અતુટોડ યોગદાનને બિરદાવવા આ રાષ્ટ્રીય કક્ષાનો કાર્યક્રમ યોજાઈ રહ્યો છે. SNIC (સ્પેશિયલ નેશનલ ઈન્ટીગ્રેશન કેમ્પ) અને રાષ્ટ્રીય એકતા દિવસ દ્વારા NCC યુવાનોમાં “રાષ્ટ્ર પ્રથમ” (Nation First) ની ભાવના સિંચવાની પોતાની સૈદ્ધાંતિક પ્રતિબદ્ધતાને વધુ મજબૂત બનાવી રહ્યું છે.
‘એક ભારત, શ્રેષ્ઠ ભારત’ નો સંદેશ
કેડેટ્સના અદમ્ય ઉત્સાહ, જુસ્સા અને રાષ્ટ્રપ્રથમના સમર્પણ સાથે આયોજિત સ્પેશિયલ નેશનલ ઈન્ટીગ્રેશન કેમ્પ (SNIC) નું સમાપન એક ભવ્ય સાંસ્કૃતિક મિશ્રણ (Cultural Event) સાથે થશે. જેમાં દેશના વિવિધ ખૂણેથી આવેલા 22 રાજ્યોના કેડેટ્સ ભારતની સમૃદ્ધ સાંસ્કૃતિક વિવિધતા, વિવિધ પરંપરાઓ અને વારસાનું આદાન-પ્રદાન કરશે. આ આયોજનથી કેડેટ્સ વચ્ચે પરસ્પર મિત્રતા, ભાઈચારો, સાંસ્કૃતિક સમજણ અને રાષ્ટ્રીય એકતાની મજબૂત ભાવનાને પ્રોત્સાહન મળશે.