અમદાવાદ શહેરમાં નશાના કાળા કારોબારમાં સક્રિય બુટલેગરો અને તસ્કરો હવે નવી નવી તરકીબો અપનાવી રહ્યા છે. અમદાવાદના નાના ચિલોડા વિસ્તારમાં ઓનલાઇન પાર્સલ ડિલિવરી સર્વિસ ‘પોર્ટર’ (Porter) નો ઉપયોગ કરીને એમડી (MD) ડ્રગ્સની સપ્લાય કરવાનો અત્યંત ચોંકાવનારો કિસ્સો સામે આવ્યો છે. ડ્રગ્સ માફિયાઓ પોલીસની નજરથી બચવા માટે હોમ ડિલિવરી પ્લેટફોર્મનો સહારો લઈ રહ્યા હોવાનો આ ઘટનાથી સણસણતો ખુલાસો થયો છે.

ડિલિવરી બોયની સુઝબુઝથી 100 નંબર પર કોલ

આ સમગ્ર કાળા કારોબારનો પર્દાફાશ એક જાગૃત અને સતર્ક પોર્ટર ડિલિવરી કર્મચારીના કારણે શક્ય બન્યો છે. નાના ચિલોડા ખાતે ગ્રાહકને ડિલિવરી આપવા પહોંચેલા કર્મચારીને પાર્સલ પર શંકા ઉપજી હતી. પાર્સલ ચકાસતાં અંદરથી શંકાસ્પદ એમડી ડ્રગ્સનો જથ્થો મળી આવતાં કર્મચારીએ સહેજ પણ ગભરાયા વગર ત્વરિત કન્ટ્રોલ રૂમના 100 નંબર પર પોલીસને કોલ કરીને સમગ્ર હકીકત જણાવી હતી. ઘટનાની ગંભીરતાને ધ્યાને લઈને નરોડા પોલીસનો કાફલો તરત જ સ્થળ પર દોડી આવ્યો હતો અને ડ્રગ્સનો જથ્થો કબ્જે કર્યો હતો.

સપ્લાયર અને નેટવર્ક અંગે તપાસ તેજ

નરોડા પોલીસે મોકા પરથી જ પાર્સલ મેળવનાર (રિસીવર) 27 વર્ષીય યુવકની અટકાયત કરી લીધી છે. પ્રાથમિક પૂછપરછ દરમિયાન આ યુવક કોના સંપર્કમાં હતો અને આ ડ્રગ્સનો જથ્થો ક્યાંથી તેમજ કોણે પોર્ટર મારફતે બુક કરાવીને મોકલ્યો હતો તે દિશામાં પોલીસે ઊંડાણપૂર્વક તપાસ હાથ ધરી છે. અમદાવાદમાં સક્રિય આંતરરાજ્ય કે સ્થાનિક ડ્રગ્સ સિન્ડિકેટ સુધી પહોંચવા માટે નરોડા પોલીસે ટેકનિકલ સર્વેલન્સ અને સીસીટીવી ફુટેજના આધારે કાયદેસરની તપાસ ચાલુ રાખી છે.

આ પણ વાંચો : Jamnagarથી વિદેશી ડેલિગેશન પરત રવાના, માર્કો રુબિયોના નેતૃત્વમાં યોજાયેલો હાઇ-પ્રોફાઇલ પ્રવાસ સંપન્ન