અમદાવાદ શહેરમાં વિકાસકામો અને બ્રિજ નિર્માણને કારણે વાહનવ્યવહાર પર મોટી અસર પડી રહી છે. તાજેતરમાં જ તંત્ર દ્વારા વેજલપુર ક્રોસિંગ તરફનો મહત્વનો રોડ વાહનવ્યવહાર માટે સંપૂર્ણપણે બંધ કરી દેવામાં આવ્યો છે. વેજલપુરથી મકરબા તરફ જતો આ મુખ્ય માર્ગ બંધ થવાને કારણે આ વિસ્તારમાંથી પસાર થતાં હજારો વાહનચાલકો ભારે મુશ્કેલીમાં મુકાયા છે. પીક અવર્સ દરમિયાન અન્ય વૈકલ્પિક રસ્તાઓ પર ટ્રાફિકનું ભારે ભારણ વધી ગયું છે, જેના કારણે વાહનચાલકોને પોતાના ગંતવ્ય સ્થાને પહોંચવામાં કલાકો સુધી ટ્રાફિક જામમાં ફસાઈ રહેવું પડે છે.
રોજિંદી અવરજવર ખોરવાતા સ્થાનિકોમાં રોષ
વેજલપુર-મકરબા રોડ બંધ થવાના કારણે આસપાસની સોસાયટીઓમાં રહેતા સ્થાનિક રહીશોની રોજિંદી અવરજવર ખૂબ જ ખોરવાઈ ગઈ છે. નોકરીયાતો, શાળા-કોલેજે જતા વિદ્યાર્થીઓ અને વેપારીઓને દરરોજ લાંબા ચક્રાવા કાપીને જવું પડે છે. અચાનક રોડ બંધ કરી દેવાતા સ્થાનિક લોકોને રોજબરોજના કામકાજ માટે ભારે હાલાકી ભોગવવી પડી રહી છે. વિસ્તારમાં નાના-મોટા અકસ્માતો અને વાહનોના લાંબા કાફલા દ્રશ્યમાન થઈ રહ્યા છે, જેનાથી સ્થાનિક રહીશોનું જીવવું દુષ્કર બન્યું છે.
તંત્રની ધીમી નીતિ સામે જનતામાં ભારે નારાજગી
આ રોડ બંધ થવાનું મુખ્ય કારણ વિસ્તારમાં ચાલી રહેલી બ્રિજની કામગીરી છે. પરંતુ સ્થાનિકોનો આરોપ છે કે તંત્ર અને કોન્ટ્રાક્ટર દ્વારા ખૂબ જ ધીમી ગતિએ કામ કરવામાં આવી રહ્યું છે. તંત્રની આ ધીમી અને અણઘડ કામગીરીનો ભોગ નિર્દોષ પ્રજા બની રહી છે. સમયસર કામ પૂરું ન થતાં અને યોગ્ય ડાયવર્ઝનનું આયોજન ન હોવાથી લોકોમાં તંત્ર સામે ભારે નારાજગી અને રોષ જોવા મળી રહ્યો છે. સ્થાનિક રહીશોએ માંગ કરી છે કે બ્રિજનું કામ ઝડપથી પૂરું કરવામાં આવે જેથી રાહત મળી શકે.