અમદાવાદ શહેરમાંથી છેલ્લા 15 વર્ષ દરમિયાન ગુમ થયેલા 30 જેટલા સગીર બાળકોને શોધી કાઢવા માટે ક્રાઇમ બ્રાન્ચે એક વિશેષ ઝુંબેશ શરૂ કરી છે. ગુમ થતી વખતે આ તમામ બાળકો 15 વર્ષથી પણ ઓછી ઉંમરના હતા, જેઓ આજે પણ વણશોધાયેલા છે. આ મામલે ક્રાઇમ બ્રાન્ચના એન્ટી હ્યુમન ટ્રાફિકિંગ યુનિટ (AHTU) દ્વારા ટેકનિકલ અને માનવ સંસાધનોનો ઉપયોગ કરીને બાળકોને શોધી તેમના પરિવાર સુધી પહોંચાડવાના પ્રયાસો અત્યંત તેજ કરી દેવામાં આવ્યા છે.
ગુમ બાળકોના ફોટા અને નામ જાહેર
એન્ટી હ્યુમન ટ્રાફિકિંગ યુનિટ દ્વારા વર્ષોથી ગુમ થયેલા તમામ 30 બાળકોના નામ, ફોટા અને ઉપલબ્ધ વિગતો જાહેર કરવામાં આવી છે. આ બાળકો અંગે કોઈપણ સચોટ કે મહત્વપૂર્ણ માહિતી પૂરી પાડનાર વ્યક્તિને રૂ. 10,000 નું રોકડ ઇનામ આપવાની પણ જાહેરાત કરવામાં આવી છે. પોલીસ તંત્ર દ્વારા નાગરિકોને અપીલ કરવામાં આવી છે કે જો તેમની પાસે આ બાળકો અંગેની કોઈ વિગત હોય તો તુરંત પોલીસનો સંપર્ક કરે.
માહિતી આપનારની ઓળખ ગુપ્ત રખાશે
પોલીસ વિભાગ દ્વારા નાગરિકોને ખાતરી આપવામાં આવી છે કે બાળકો અંગે માહિતી આપનાર વ્યક્તિની ઓળખ સંપૂર્ણપણે ગુપ્ત રાખવામાં આવશે. ગુમ થયેલા આ બાળકો કે જેઓ તે સમયે સગીર વયના હતા, તેમને ફરીથી પોતાના પરિવારજનો સાથે મિલન કરાવવાના ઉમદા હેતુથી એન્ટી હ્યુમન ટ્રાફિકિંગ યુનિટ દ્વારા રાત-દિવસ શોધખોળ ચલાવવામાં આવી રહી છે. કોઈ પણ વિશ્વસનીય માહિતી મળે તો તાત્કાલિક પોલીસ સુધી પહોંચાડવા સ્થાનિક સત્તાવાળાઓએ અપીલ કરી છે.