અમદાવાદ શહેરમાં માર્ગ સલામતી અને ટ્રાફિક નિયમોના સરેઆમ ધજાગરા ઉડાડતા કારચાલકો સામે પોલીસે કડક વલણ અપનાવ્યું છે. શહેરમાં અત્યંત ઓવરસ્પીડ અને જોખમી રીતે દોડતી એક લક્ઝુરિયસ પોર્સ કારના ચાલક સામે પોલીસે ત્વરિત કાર્યવાહી હાથ ધરી છે. જાહેર રસ્તા પર અન્ય વાહનચાલકો અને રાહદારીઓના જીવ જોખમમાં મૂકાય તે રીતે બેફામ કાર ચલાવવામાં આવી રહી હતી. ઘટનાની ગંભીરતાને ધ્યાને લઈને પોલીસે કારચાલક સામે કાયદેસરની ફરિયાદ નોંધીને કાર્યવાહી હાથ ધરી છે.

પોલીસે પોર્સ કાર જપ્ત કરી ચાલક સામે નોંધ્યો ગુનો

ઓવરસ્પીડિંગ અને રેકલેસ ડ્રાઇવિંગ કરી રહેલા કારચાલકને અટકાવી પોલીસે તાત્કાલિક મોરચો સંભાળ્યો હતો. પોલીસે બિનજવાબદાર રીતે કાર હંકારનાર ચાલક સામે ગુનો દાખલ કરવાની સાથે જ પોર્સ કારને કબ્જે કરી લીધી છે. રોડ પર નિયમોનું ઉલ્લંઘન કરનારા તત્વો સામે દાખલો બેસાડવાના હેતુથી પોલીસે ઓવરસ્પીડિંગ અને જોખમી ડ્રાઇવિંગ બદલ આ આકરી કાર્યવાહી કરી છે.

ગાંધીનગરના લીંબડીયાનો 24 વર્ષીય યુવક કાર ચલાવતો હતો

પોલીસ તપાસમાં સામે આવ્યું છે કે આ કાર ગાંધીનગર નજીક આવેલા લીંબડીયા ગામનો 24 વર્ષીય યુવક મોહમ્મદ આકરાંન ચલાવી રહ્યો હતો. તપાસમાં એ પણ ખૂલ્યું છે કે આ લક્ઝુરિયસ કાર તેના પિતા મોહમ્મદ ઈલ્યાસ તિરમીજીના નામે નોંધાયેલી છે. પિતાની કાર લઈને અમદાવાદના માર્ગો પર સ્પીડની મજા માણવી આ યુવકને ભારે પડી ગઈ છે અને પોલીસે કારચાલક સામે આગળની કાયદેસરની તપાસ તેજ કરી છે.

આ પણ વાંચો : Banaskantha News: ડીસા રેલવે સ્ટેશન પર ACBનો સપાટો, રૂ. 500ની લાંચ લેતા રેલવે કર્મચારી ઝડપાયો