અમદાવાદના બહેરામપુરા વિસ્તારમાં આવેલા મેલડી માતાના મંદિર પાસે ગત 16 ઓગસ્ટના રોજ એક ગંભીર માર્ગ અકસ્માત સર્જાયો હતો. આ ભયાનક દુર્ઘટનાના CCTV ફૂટેજ હવે સામે આવ્યા છે. વીડિયોમાં સ્પષ્ટ દેખાય છે કે પૂરઝડપે આવી રહેલી એક ગુજરાત એસટી (ST) બસે રોડ પરથી પસાર થઈ રહેલા ટુ-વ્હીલર ચાલકને જોરદાર ટક્કર મારી હતી. અકસ્માત એટલો સખત હતો કે ટક્કર વાગતા જ યુવક હવામાં ફેંકાઈને રોડ પર પછડાયો હતો અને તેને માથા તેમજ શરીરના અન્ય ભાગોમાં ગંભીર ઈજાઓ પહોંચી હતી.

5 દિવસ કોમામાં રહ્યા બાદ યુવકે દમ તોડ્યો

ઘટના બનતા જ આસપાસના લોકો એકઠા થઈ ગયા હતા અને ઈજાગ્રસ્ત યુવકને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો હતો. બસની ટક્કરથી માથામાં થયેલી ગંભીર ઈજાના કારણે યુવક ઘટનાસ્થળે જ કોમામાં જતો રહ્યો હતો. ડોક્ટરોની ટીમે તેને બચાવવા માટે સતત પ્રયાસો કર્યા હતા, પરંતુ 5 દિવસ સુધી હોસ્પિટલમાં જિંદગી અને મરણ વચ્ચે ઝોલા ખાધા બાદ આજે 21 ઓગસ્ટના રોજ યુવકનું સારવાર દરમિયાન કમનસીબ મોત નીપજ્યું છે. યુવકના મોતથી પરિવારમાં ભારે અરેરાટી વ્યાપી ગઈ છે.

પોલીસે CCTV ફૂટેજના આધારે તપાસ તેજ કરી

આ અકસ્માતના વીડિયો સોશિયલ મીડિયા પર વાયરલ થતાં જ સ્થાનિકોમાં એસટી બસના ચાલકની બેદરકારી સામે ભારે રોષ જોવા મળી રહ્યો છે. બનાવ અંગે પોલીસે ગુનો નોંધીને આગળની કાયદેસરની કાર્યવાહી હાથ ધરી છે. વાયરલ સીસીટીવી ફૂટેજના આધારે એસટી બસના ચાલક સામે કલમ હેઠળ કેસ દાખલ કરવામાં આવ્યો છે. પોલીસે ચાલકની ધરપકડ કરવાની કવાયત હાથ ધરી છે અને અકસ્માત સમયની સમગ્ર ઘટના અંગે વધુ તપાસ ચલાવી રહી છે.

આ પણ વાંચો : Diuના વણાંકબારા દરિયામાં બોટ ડૂબી, ટંડેલ સહિત 6 માછીમારોનો આબાદ બચાવ