ગુજરાત યુનિવર્સિટીના પૂર્વ વાઇસ ચાન્સેલર (VC) ડૉ. નીરજા ગુપ્તાને લઈને ચાલી રહેલા કરોડોના ગ્રાન્ટ કૌભાંડ વિવાદમાં મોટો અને ચોંકાવનારો ધડાકો થયો છે. યુનિવર્સિટીને વિવિધ સંશોધન અને વિકાસ માટે મળેલી સરકારી ગ્રાન્ટની રકમ પોતાના અંગત બેંક ખાતામાં ટ્રાન્સફર કરાવવાને લઈને સર્જાયેલા ભારે વિવાદ અને નિવૃત્ત જજની કમિટી દ્વારા ચાલતી તપાસ વચ્ચે પૂર્વ કુલપતિએ ₹14 કરોડથી વધુની રકમ યુનિવર્સિટીને પરત કરી દીધી છે. વર્તમાન ઇન્ચાર્જ વીસી દ્વારા પણ આ અંગે પુષ્ટિ કરવામાં આવી છે અને બાકીના નાણાંના હિસાબો મેળવવા કવાયત શરૂ કરી છે.
ગુજરાત યુનિવર્સિટી કૌભાંડમાં મોટો ધડાકો
મળતી વિગતો મુજબ, ‘પ્રધાનમંત્રી જન વિકાસ કાર્યક્રમ’ (PMJVK) અને ‘બ્રેઇન મેપિંગ પ્રોજેક્ટ’ હેઠળ યુનિવર્સિટીને કરોડો રૂપિયાની ગ્રાન્ટ મળી હતી. કુલપતિ તરીકેનો કાર્યકાળ પૂર્ણ થઈ ગયો હોવા છતાં નીરજા ગુપ્તા આ બંને મહત્ત્વના પ્રોજેક્ટ્સમાં પ્રિન્સિપાલ ઇન્વેસ્ટિગેટર (PI) તરીકે સક્રિય રહ્યા હતા અને તેમના પર્સનલ ખાતામાં નાણાં જમા થતા રહ્યા હતા. આ મામલે કાયદાકીય શિકંજો કસાતાં અને વિરોધ ઉગ્ર બનતાં તેમણે ₹14 કરોડથી વધુ રકમ ડિમાન્ડ ડ્રાફ્ટ/ચૂકવણી દ્વારા પરત કરી બંને પ્રોજેક્ટના PI પદેથી પણ રાજીનામું આપી દીધું છે.
પૂર્વ કુલપતિ નીરજા ગુપ્તાએ 14 કરોડથી વધુની રકમ પરત કરી
બીજી તરફ આ ઘટનાને પગલે વિદ્યાર્થી સંગઠન NSUI દ્વારા ગુજરાત યુનિવર્સિટી કેમ્પસ ખાતે ઉગ્ર વિરોધ પ્રદર્શન કરવામાં આવ્યું હતું. ઓડિટ રિપોર્ટનો હવાલો આપી NSUIએ ગંભીર આક્ષેપ કર્યો છે કે નીરજા ગુપ્તાએ IDSRમાંથી ₹24.98 લાખ અને રજિસ્ટ્રાર પીયૂષ પટેલે ₹3.20 લાખનો ગેરકાયદે પગાર લીધો છે. રજિસ્ટ્રાર પીયૂષ પટેલની પણ મિલીભગત હોવાનો આરોપ મૂકી તેમની સામે કડક કાર્યવાહી કરવાની માંગ સાથે NSUI દ્વારા આવતીકાલે ‘ગુજરાત યુનિવર્સિટી બંધ’નું એલાન આપવામાં આવ્યું છે.