અમદાવાદ શહેરના નિકોલ વિસ્તારમાં આવેલી ડાયમંડ પાર્ક સોસાયટીમાંથી એક અત્યંત ચોંકાવનારો અને દર્દનાક કિસ્સો સામે આવ્યો છે. નિકોલમાં રહેતા ભાવેશ બારૈયા નામના શખ્સે પોતાની પત્ની રેખા બારૈયા પર તીક્ષ્ણ હથિયાર વડે મરણતોલ હુમલો કર્યો હતો. લોહીલુહાણ હાલતમાં પત્નીને છોડીને પતિ સ્થળ પરથી પલાયન થઈ ગયો હતો. ઘટનાને પગલે સોસાયટીના રહીશો એકઠા થઈ ગયા હતા અને ગંભીર રીતે ઘવાયેલી રેખા બારૈયાને તાત્કાલિક સારવાર અર્થે નજીકની હોસ્પિટલમાં દાખલ કરવામાં આવી છે.

છેલ્લા 10 દિવસથી પતિ-પત્ની વચ્ચે ચાલતો હતો ઉગ્ર કલહ

પોલીસની પ્રાથમિક તપાસમાં બહાર આવ્યું છે કે, ભાવેશ બારૈયા અને તેની પત્ની રેખા બારૈયા વચ્ચે છેલ્લા 10 દિવસથી કોઈ પારિવારિક બાબતે સતત તકરાર અને ઝઘડો ચાલી રહ્યો હતો. સતત થતા કંકાસથી કંટાળીને પત્ની રેખા નિકોલ ખાતે આવેલી પોતાની બહેનના ઘરે રહેવા માટે જતી રહી હતી. ગત રોજ પતિ ભાવેશ તેની બહેનના ઘરે પહોંચ્યો હતો અને આવેશમાં આવીને પત્ની પર જીવલેણ હુમલો કરી દીધો હતો.

હુમલો કર્યા બાદ પતિએ અમરેલી રેલ્વે ટ્રેક પર જીવન ટૂંકાવ્યું

પત્ની પર હુમલો કર્યા બાદ ગભરાઈ ગયેલો અને આવેશમાં આવી ગયેલો પતિ ભાવેશ બારૈયા સીધો અમરેલી પહોંચી ગયો હતો. ત્યાં તેણે અમરેલી પાસે આવેલી રેલ્વે લાઈન પર ટ્રેન નીચે ઝંપલાવીને પોતાની જિંદગીનો અંત આણ્યો હતો. પત્ની પર હુમલો કર્યાના ગણતરીના કલાકોમાં જ પતિએ આત્મહત્યા કરી લેતાં બંને પરિવારોમાં ભારે અરેરાટી અને શોકની કાળી ડિબંગ છવાઈ ગઈ છે.

નિકોલ પોલીસે ગુનો નોંધી વધુ તપાસ હાથ ધરી

બનાવની જાણ થતાં જ નિકોલ પોલીસ સ્ટેશનનો કાફલો ઘટના સ્થળે દોડી આવ્યો હતો. નિકોલ પોલીસે કૌટુંબિક હિંસા અને હત્યાના પ્રયાસ અંગે ગુનો નોંધીને કાયદાકીય તપાસ લંબાવી છે. પોલીસે અમરેલી પોલીસનો સંપર્ક કરી પતિના મૃતદેહના પોસ્ટ મોર્ટમ સહિતની જરૂરી કાગળિયા કાર્યવાહી હાથ ધરી છે.

આ પણ વાંચો – 30 August Top News: PM મોદીનો વિદેશ પ્રવાસ અને મુખ્ય સમાચાર અને સંપૂર્ણ ઈતિહાસ