અમદાવાદ શહેરના સંવેદનશીલ ગણાતા ગોમતીપુર વિસ્તારમાંથી એક ચોંકાવનારી અને હચમચાવી નાખતી ઘટના સામે આવી છે. ગોમતીપુરમાં પૂજારીની ચાલી પાસે આવેલી આયેશા મસ્જિદની ગલીમાં સામાન્ય બાબતે બાળકો વચ્ચે ઝઘડો થયો હતો. આ બાળકોના ઝઘડાને શાંત કરાવવા અને વચ્ચે પડીને સમજાવવાનો પ્રયાસ કરનાર એક યુવક પર અદાવત રાખીને ઘાતકી હુમલો કરવામાં આવ્યો હોવાની ઘટનાએ સમગ્ર વિસ્તારમાં ચકચાર મચાવી દીધી છે.

બે ભાઈઓએ તલવારના ઘા ઝીંકી યુવકને કર્યો લોહીલુહાણ

પ્રાપ્ત વિગતો અનુસાર, કેફ હાશ્મી અને તોસિફ હાશ્મી નામના બે શખ્સોએ અગાઉ થયેલી બોલાચાલીની અદાવત રાખીને મોહમ્મદ હુસેન શેખ નામના યુવક પર તલવાર વડે હુમલો કર્યો હતો. બંને આરોપી ભાઈઓએ એકસંપ થઈને યુવક પર તલવારના આડેધડ ઘા ઝીંકી દીધા હતા, જેના કારણે મોહમ્મદ હુસેનને શરીરના ભાગે ગંભીર ઈજાઓ પહોંચી હતી અને તે લોહીલુહાણ હાલતમાં જમીન પર ફસડાઈ પડ્યો હતો. હુમલો કર્યા બાદ બંને આરોપીઓ જાનથી મારી નાખવાની ધમકી આપીને ઘટના સ્થળેથી ફરાર થઈ ગયા હતા.

સમગ્ર ઘટના સીસીટીવી કેમેરામાં થઈ કેદ

આ લોહિયાળ હુમલાની આખી ઘટના નજીકમાં લાગેલા સીસીટીવી કેમેરામાં સ્પષ્ટપણે કેદ થઈ ગઈ છે. વીડિયોમાં સ્પષ્ટ જોઈ શકાય છે કે, કેવી રીતે આરોપીઓએ બેફામ બનીને યુવક પર તલવારથી હુમલો કર્યો હતો. આ સીસીટીવી ફૂટેજ હાલ તપાસ માટે મહત્વનો પુરાવા બન્યા છે, જેના આધારે પોલીસે વધુ તપાસ શરૂ કરી છે.

ઈજાગ્રસ્ત યુવક સિવિલ હોસ્પિટલમાં દાખલ, પોલીસ ફરિયાદ નોંધાઈ

ઘટનાની જાણ થતા જ સ્થાનિક લોકો તાત્કાલિક મદદે દોડી આવ્યા હતા અને ગંભીર રીતે ઘાયલ થયેલા મોહમ્મદ હુસેન શેખને તાત્કાલિક સારવાર અર્થે અમદાવાદની સિવિલ હોસ્પિટલ ખાતે ખસેડવામાં આવ્યા હતા, જ્યાં તેમની સારવાર ચાલી રહી છે. બીજી તરફ, આ મામલે ગોમતીપુર પોલીસ સ્ટેશનમાં કેફ હાશ્મી અને તોસિફ હાશ્મી વિરુદ્ધ કાયદેસરની ફરિયાદ નોંધવામાં આવી છે. પોલીસે ગુનો નોંધીને ફરાર થઈ ગયેલા બંને આરોપીઓને ઝડપી પાડવા માટે ચક્રો ગતિમાન કર્યા છે.

આ પણ વાંચો: Ahmedabad News: વિરમગામમાં SMCની રેડ, નળસરોવર હાઇવે પરથી વિદેશી દારૂના જથ્થા સાથે 2 ઝડપાયા!