અમદાવાદ શહેરમાં દિવાળીના તહેવારોની ખરીદીનો માહોલ જામી રહ્યો છે ત્યારે શહેરના સૌથી વ્યસ્ત અને અગ્રણી વ્યાપારી હબ ગણાતા બાપુનગર વિસ્તારના વેપારીઓ દ્વારા તંત્ર સમક્ષ વિશેષ રજૂઆત કરવામાં આવી છે. દિવાળી ટાણે બાપુનગર ચાર રસ્તા અને આસપાસના બજારોમાં લાખો લોકો ખરીદી માટે ઉમટી પડતા હોવાથી ભારે ભીડ અને ટ્રાફિકની સમસ્યા સર્જાય છે. આ સમસ્યાના નિવારણ માટે વેપારી એસોસિએશન દ્વારા પોલીસ કમિશનર અને અમદાવાદ મ્યુનિસિપલ કોર્પોરેશન (AMC) ને સત્તાવાર પત્ર પાઠવીને વહેલી તકે યોગ્ય આયોજન કરવા માંગ કરાઈ છે.

પાથરણા અને લારીઓના ધસારા પર નિયંત્રણની માંગ

તહેવારોની મોસમમાં બાપુનગરના માર્ગો પર અચાનક પાથરણા અને લારીઓનો ભારે ધસારો વધી જતો હોય છે, જેના કારણે મુખ્ય રસ્તાઓ બ્લોક થઈ જાય છે અને ખરીદી કરવા આવતા ગ્રાહકોને મુશ્કેલી પડે છે. વેપારીઓએ પોતાની રજૂઆતમાં સ્પષ્ટ કર્યું છે કે ટ્રાફિક નિયમન કરતી વખતે એ વાતનું ધ્યાન રાખવું જરૂરી છે કે કોઈ નાના વેપારી કે ફેરિયાને રોજગારી બાબતે આર્થિક નુકસાન ન થાય, પરંતુ સાથે જ બજારમાં અરાજકતા પણ ન ફેલાય તેવું સમતોલ આયોજન કરવું જોઈએ.

‘કેપ્સ્યુલ સિસ્ટમ’થી ટ્રાફિક હળવો થવાની આશા

અગાઉ પણ ટ્રાફિક નિયંત્રણ માટે ઉપયોગમાં લેવાયેલી ‘કેપ્સ્યુલ સિસ્ટમ’ ની સફળતાને લઈને વેપારીઓએ સંતોષ વ્યક્ત કર્યો છે. જો તહેવારોના આ દિવસોમાં બાપુનગર વિસ્તારમાં આ સિસ્ટમનો સચોટ અમલ કરવામાં આવે તો ટ્રાફિકની સમસ્યાથી મોટા પ્રમાણમાં છુટકારો મળી શકે છે. પોલીસ અને AMC દ્વારા આ મામલે સકારાત્મક પગલાં લેવામાં આવે તેવી આશા વેપારી આલમ દ્વારા વ્યક્ત કરવામાં આવી છે, જેથી ઉત્સવના માહોલમાં લોકો મુક્તપણે ખરીદી કરી શકે.

આ પણ વાંચો : Gandhinagar News : ગુજરાત સરકારનું ‘ઓપરેશન ગંગાજળ’ યથાવત, CM ભૂપેન્દ્ર પટેલે વધુ બે ભ્રષ્ટ અધિકારીઓને ઘરે મોકલ્યા!