દીપાવલીના પવિત્ર તહેવારને આડે હવે ગણતરીના દિવસો જ બાકી રહ્યા છે ત્યારે અમદાવાદ (Ahmedabad) ના પ્રખ્યાત અને ખરીદી માટે ધમધમતા લાલ દરવાજા (Lal Darwaja) વિસ્તારમાંથી એક ગરમાગરમીના સમાચાર સામે આવ્યા છે. તહેવારોની ખરીદી કરવા માટે ઉમટેલી ભારે ભીડ વચ્ચે મ્યુનિસિપલ કોર્પોરેશન (AMC) ની દબાણ હટાવવાની ટીમ રસ્તા પર ઉતરી હતી. આ કાર્યવાહી દરમિયાન પાથરણાવાળાઓ અને AMC ના કર્મચારીઓ વચ્ચે ભારે ઘર્ષણ અને માથાકૂટ સર્જાઈ હતી, જેના કારણે થોડા સમય માટે બજારમાં અફડાતફડીનો માહોલ છવાઈ ગયો હતો.

રસ્તા પર મચી અફડાતફડી

પ્રાપ્ત વિગતો અનુસાર, દિવાળીના વેચાણ માટે બેઠેલા પાથરણાવાળાઓ અને લારી-ગલ્લાવાળાઓની જગ્યા ખાલી કરાવવા માટે દબાણ હટાવવાની ટીમ પોલીસ કાફલા સાથે પહોંચી હતી. તહેવારના ટાણે જ રોજગારી છીનવાઈ રહી હોવાના આક્ષેપ સાથે પાથરણાવાળાઓ ઉશ્કેરાઈ ગયા હતા અને તેમણે સ્થળ પર જ જોરદાર હોબાળો મચાવ્યો હતો. આ કાર્યવાહીનો ઉગ્ર વિરોધ કરતા લોકોની AMC ની ટીમ અને સાથે રહેલા પોલીસકર્મીઓ સાથે તીખી બોલાચાલી થઈ હતી. રસ્તાની વચ્ચે જ થયેલી આ બોલાચાલીના કારણે ખરીદી કરવા આવેલા સામાન્ય નાગરિકો અને વાહનચાલકો પણ મુશ્કેલીમાં મુકાયા હતા.

દિવાળી ટાણે રોજગારીનો પ્રશ્ન એરણ પર

પરિસ્થિતિ વધુ વણસે નહીં તે માટે સ્થળ પર હાજર પોલીસ બળ દ્વારા ત્વરિત હસ્તક્ષેપ કરવામાં આવ્યો હતો. પોલીસે સમજાવટ અને કડકાઈ દાખવીને ઉશ્કેરાયેલા લોકોને શાંત પાડ્યા હતા અને માંડ મામલો થાળે પાડીને રસ્તો ખુલ્લો કરાવ્યો હતો. તહેવારોના દિવસોમાં એક તરફ ગ્રાહકો ખરીદીમાં મશગુલ હોય છે ત્યારે બીજી તરફ ગરીબ શ્રમિકો અને પાથરણાવાળાઓની રોજીરોટીનો પ્રશ્ન સામે આવતા લાલ દરવાજા વિસ્તારમાં આ ઘટના ચર્ચાનો વિષય બની રહી હતી.

આ પણ વાંચો : Surat News : રવિવારે પણ ખુલ્લી રહી RTO કચેરી! દિવાળીની રજાઓને ધ્યાનમાં રાખી તંત્રનો લોકઉપયોગી નિર્ણય