અમદાવાદ શહેરમાં વિદ્યાર્થીઓ અને નોકરિયાત વર્ગ માટે રહેઠાણ બનતા પેઈંગ ગેસ્ટ એટલે કે PG સંચાલકોની મનમાની અને દાદાગીરીના કિસ્સાઓ દિનપ્રતિદિન વધી રહ્યા છે. તાજેતરમાં જ નવરંગપુરા વિસ્તારમાં આવેલા જાણીતા પીજીમાં સર્જાયેલી એક ઉગ્ર બબાલે સમગ્ર શહેરમાં ચકચાર જગાવી દીધી છે. સામાન્ય બાબતમાં શરૂ થયેલો વિવાદ એટલો વધી ગયો કે મામલો પોલીસ સ્ટેશન સુધી પહોંચ્યો હતો.

વાહન પાર્કિંગ મુદ્દે યુવકો સાથે મારામારી

પ્રાપ્ત માહિતી અનુસાર, નવરંગપુરા વિસ્તારમાં ધ યુનાઇટેડ સ્ટેટ નામના પીજીમાં રહેતા યુવકો સાથે વાહન સાઇડમાં પાર્ક કરવા બાબતે ગરમાગરમી થઈ હતી. આ સામાન્ય બોલાચાલી બાદ પીજીના માલિક અને મેનેજરે ઉશ્કેરાઈને યુવકો સાથે મારામારી કરી હતી. આક્ષેપ છે કે, આરોપીઓએ એકાએક હુમલો કરીને યુવકોને માર માર્યો હતો, જેના કારણે આસપાસના વિસ્તારમાં પણ ભારે અરાજકતા ફેલાઈ ગઈ હતી.

પોલીસ સ્ટેશનમાં પણ રોફ જમાવ્યાનો ગંભીર આક્ષેપ

આ વિવાદ માત્ર પીજી પરિસરમાં જ સીમિત નહોતો રહ્યો, પરંતુ વાત પોલીસ સ્ટેશન સુધી પહોંચી હતી. પીડિત યુવકો દ્વારા એવો ગંભીર આક્ષેપ કરવામાં આવ્યો છે કે, પીજીના માલિક અને મેનેજરે પોલીસ સ્ટેશનની હદમાં પણ પોતાની દાદાગીરી ચાલુ રાખી હતી અને રોફ જમાવવાનો પ્રયાસ કર્યો હતો. કાયદો અને વ્યવસ્થાના ધજાગરા ઉડાવતી આ ઘટનાને લઈને સ્થાનિક રહીશોમાં પણ ભારે રોષ જોવા મળી રહ્યો છે.

બંને પક્ષ સામે ગુનો દાખલ

સમગ્ર મામલાની ગંભીરતાને ધ્યાનમાં રાખીને નવરંગપુરા પોલીસે ત્વરિત કાર્યવાહી હાથ ધરી છે. પોલીસે પીડિતો અને સંચાલકો બંને પક્ષની રજૂઆતો સાંભળીને કાયદેસરની કાર્યવાહીના ભાગરૂપે ગુનો નોંધ્યો છે. હાલ પોલીસ દ્વારા આસપાસના સીસીટીવી ફૂટેજ અને અન્ય પુરાવાઓના આધારે વધુ તપાસ ચલાવવામાં આવી રહી છે, જેથી સત્ય બહાર આવી શકે.

આ પણ વાંચો: Ahmedabad News: નવરાત્રિ બાદ ડેન્ગ્યુ અને વાયરલના કેસોમાં મોટો ઉછાળો, સોલા સિવિલમાં OPDમાં અધધ વધારો!