અમદાવાદ શહેરના વાડજ વિસ્તારમાંથી ગુનાખોરીનો એક અત્યંત ચકચારી અને ચોંકાવનારો કિસ્સો સામે આવ્યો છે. ખાનગી કંપનીમાં એકાઉન્ટન્ટ તરીકે નોકરી કરતા એક યુવકને કેટલાક શખ્સો દ્વારા આયોજનબદ્ધ રીતે હનીટ્રેપ અને બ્લેકમેલિંગનો ભોગ બનાવવામાં આવ્યો છે. શરૂઆતમાં અજાણી મહિલાના નામે યુવકને મેસેજ મોકલીને નકલી નોટ લેવા બાબતે ફસાવવામાં આવ્યો હતો અને ત્યારબાદ તેની સાથે અશ્લીલ વાતો કરાવીને ટ્રેપ ગોઠવવામાં આવી હતી. આ સાજીશ એટલી ખતરનાક હતી કે નિર્દોષ યુવકને ડરાવી-ધમકાવીને તેની પાસેથી લાખો રૂપિયાની ખંડણી વસૂલવામાં આવી હતી.

મામાના દીકરાએ જ રચ્યું કાવતરું

આ કાવતરામાં સૌથી મોટો વિશ્વાસઘાત કરનાર બીજું કોઈ નહીં પરંતુ પીડિત યુવકનો મામાનો દીકરો અજય પરમાર નીકળ્યો હતો. મેસેજ આવ્યા બાદ મામાના દીકરા અજયે ફોન કરીને તે મહિલા પોતાના મિત્રની પત્ની હોવાનું નાટક કર્યું હતું અને નારોલ પોલીસ સ્ટેશનમાં ફરિયાદી સામે છેડતીની ગંભીર ફરિયાદ થઈ હોવાનું કહીને ડરાવ્યો હતો. કેસ પતાવવાના નામે પહેલા ૧૫ હજાર રૂપિયા પડાવ્યા અને ત્યારબાદ હાઇકોર્ટમાં અરજી થઈ છે તેમ કહીને બનાવટી અરજી તથા નારોલ પોલીસની નકલી છેડતીની FIR મોકલી હતી. સમાધાન માટે ૨ લાખ રૂપિયાની માંગણી કરી હતી અને નોટિસના દંડ ભરવાના નામે પણ પઠાણી ઉઘરાણી કરી હતી. પીડિત યુવકે પોતાની રોજીરોટીનું સાધન એવું બાઇક વેચીને પણ આ આરોપીઓને રૂપિયા આપવા મજબૂર બનવું પડ્યું હતું.

નારોલ પોલીસમાં તપાસ કરતા ભાંડો ફૂટ્યો

યુવકને શંકા જતા તેણે હિંમત કરીને નારોલ પોલીસ સ્ટેશનમાં રૂબરૂ જઈને તપાસ કરી હતી, જ્યાં કોઈ જ પ્રકારની ફરિયાદ નોંધાઈ જ નથી તેવો ચોંકાવનારો ખુલાસો થયો હતો. પોતાની સાથે થયેલી છેતરપિંડી અને બ્લેકમેલિંગનો અહેસાસ થતાં પીડિત યુવક મિહિર પરમારે ત્વરિત પગલાં લઈને વાડજ પોલીસ સ્ટેશનનો સંપર્ક સાધ્યો હતો. વાડજ પોલીસે મામાના દીકરા અજય પરમાર અને મેસેજ કરનાર મહિલા સહિતના સામે કાયદેસરની ગુનાહિત ફરિયાદ નોંધીને આરોપીઓને દબોચી લેવા માટે સઘન તપાસના ચક્રો ગતિમાન કર્યા છે.

આ પણ વાંચો : Tarapurના મોરજ ગામે ધમધમતો મોટો ખતરો! જીવતા બોમ્બ સમાન ગો-ગેસ રિફિલ પ્લાન્ટ પર પોલીસની લાલ આંખ