અમદાવાદ શહેરમાં રિયલ એસ્ટેટના બેફામ વિકાસ વચ્ચે સેફ્ટીના નિયમોને નેવે મૂકીને ચાલતા બાંધકામો સામાન્ય નાગરિકો માટે જીવનું જોખમ બની રહ્યા છે. તાજેતરમાં જ શહેરના પોશ અને ગીચ ગણાતા ગોતા વિસ્તાર માંથી એક ચોંકાવનારી ઘટના સામે આવી છે. ગોતાના મુખ્ય વંદેમાતરમ રોડ પર આવેલી પાર્ક વ્યૂ સાઇટ પાસે અચાનક જ જમીન ધસી પડવાની મોટી ઘટના બની હતી. જમીન બેસી જવાના કારણે આસપાસના વિસ્તારમાં ભારે હડકંપ મચી ગયો હતો અને ઘટનાસ્થળે લોકોના ટોળેટોળા એકઠા થઈ ગયા હતા.

શાયોના તિલક-3 ફ્લેટની દીવાલ ધરાશાયી

આ જમીન ધસી પડવાની ઘટના એટલી ભયાનક હતી કે તેની સીધી અસર બાજુમાં આવેલા શાયોના તિલક-3 ફ્લેટ પર જોવા મળી હતી. આ રેસિડેન્શિયલ ફ્લેટની કમ્પાઉન્ડ કે સેફ્ટી દીવાલ અચાનક ધરાશાયી થઈને ખાડામાં ખાબકી હતી. અચાનક બનેલી આ ઘટનાથી ફ્લેટમાં રહેતા રહીશોમાં પોતાના મકાનોની સલામતીને લઈને ભારે ગભરાટ અને ભયનો માહોલ ફેલાઈ ગયો છે. અસુરક્ષિત રીતે કરવામાં આવેલા ઊંડા ખોદકામના કારણે આસપાસના રહીશોના જીવન અને મિલકતો જોખમમાં મુકાયા છે.

બાંધકામની ગુણવત્તા અને સેફ્ટી સામે ગંભીર સવાલો

આ ઘટના બાદ સ્થાનિક રહેવાસીઓ અને આગેવાનો દ્વારા સંબંધિત નિર્માણાધીન સાઇટના બિલ્ડર અને ઇજનેરોની બેદરકારી સામે ઉગ્ર રોષ વ્યક્ત કરવામાં આવ્યો છે. લોકોનું સ્પષ્ટપણે કહેવું છે કે મ્યુનિસિપલ કોર્પોરેશન (AMC) ની રહેમનજર હેઠળ ચાલતા આવા નબળા અને બેજવાબદાર બાંધકામો ક્યારેક કોઈ નિર્દોષનો ભોગ લઈ શકે છે. ઘટનાની ગંભીરતા જોતા સ્થાનિક તંત્ર અને ટાઉન પ્લાનિંગ વિભાગ દ્વારા તાત્કાલિક ધોરણે આ સાઇટનું કામ અટકાવીને જવાબદારો સામે ફોજદારી અને દંડનીય કાર્યવાહી કરવામાં આવે તેવી પ્રબળ માંગ ઉઠી છે.

આ પણ વાંચો : Vapi News : રમતમાં થયેલી બોલાચાલી બની ખૌફનાક હિંસા, બાળકી અને તેની માતા પર હુમલાનો Video Viral