અમદાવાદ શહેરના નારોલ વિસ્તારમાંથી એક અત્યંત હૃદયદ્રાવક અને તંત્રની ગંભીર બેદરકારી છતી કરતી ઘટના સામે આવી છે. અહીં રમી રહેલી મનીષા સલાટ નામની એક માસુમ બાળકી અચાનક જ 20 ફૂટ ઊંડી ગટરમાં પડી જતાં ગુમ થઈ ગઈ છે. અચાનક બનેલી આ ઘટનાથી સ્થાનિકોમાં ભારે દોડધામ મચી ગઈ હતી અને બાળકીના પરિવારજનો પર આભ તૂટી પડ્યું છે.

નારોલ પોલીસે નોંધાઈ જાણવા જોગ

ઘટના અંગે તાત્કાલિક પોલીસ અને તંત્રને જાણ કરવામાં આવી હતી. નારોલ પોલીસે આ મામલે બાળકી ગુમ થયા અંગેની જાણવા જોગ નોંધ દાખલ કરીને આગળની કાનૂની અને તપાસની તજવીજ હાથ ધરી છે. આ સાથે જ 20 ફૂટ ઊંડી ગટરમાં ગરકાવ થયેલી બાળકી મનીષા સલાટને વહેલી તકે સલામત રીતે બહાર કાઢવા માટે અમદાવાદ ફાયર બ્રિગેડની મદદ લેવામાં આવી છે.

તંત્રની બેદરકારી સામે સ્થાનિકોમાં રોષ

બાળકી ગટરના વહેણમાં તણાઈ ગઈ હોવાની આશંકા વચ્ચે ફાયર વિભાગના જવાનો દ્વારા ખાસ સાધનો અને ઓક્સિજન સિલિન્ડર સાથે ગટરમાં ઉતરીને શોધખોળ હાથ ધરવામાં આવી રહી છે. ખુલ્લી અથવા મજબૂત ઢાંકણા વગરની 20 ફૂટ ઊંડી ગટરને કારણે માસુમ બાળકીનો જીવ જોખમમાં મુકાતાં સ્થાનીક રહીશોમાં વહીવટી તંત્ર સામે ભારે આક્રોશ અને રોષ જોવા મળી રહ્યો છે. હાલ ફાયર બ્રિગેડ દ્વારા બાળકીને શોધવા માટે સતત રેસ્ક્યૂ ઓપરેશન ચલાવવામાં આવી રહ્યું છે.

આ પણ વાંચો : Rajkot: નાના મવા સર્કલે AQI 300 ને પાર પહોંચતાં રેડ એલર્ટ જેવી સ્થિતિ, શહેરીજનોના શ્વાસ રુંધાયા!