અમદાવાદની પ્રતિષ્ઠિત આઈઆઈએમ (IIM) સંસ્થાના પરિસરમાં યુવતીની છેડતીનો ચોંકાવનારો કિસ્સો સામે આવ્યો છે. ઓનલાઈન ઓર્ડર કરાયેલું ફૂડ ડિલિવરી આપવા માટે આવેલ એક યુવકે ગ્રાહક યુવતી સાથે અસભ્ય વર્તન કર્યું હતું. ફૂડ પાર્સલ આપતી વખતે યુવકની દાનત બગડી હતી અને તેણે યુવતીની છેડતી કરવાનો પ્રયાસ કર્યો હતો, જેનાથી કેમ્પસ અને આસપાસના વિસ્તારમાં ભારે સનસનાટી મચી ગઈ છે.

યુવતી સામે બિભસ્ત શબ્દો ઉચ્ચારીને અસભ્ય વર્તન કર્યું

ફૂડ ડિલિવરી કરવા આવેલા યુવકે ન કેવળ છેડતી કરી પરંતુ યુવતી સામે અત્યંત બિભસ્ત અને અશોભનીય શબ્દો બોલીને તેનું માનભંગ કરવાનો પ્રયાસ કર્યો હતો. અચાનક બનેલી આ ઘટનાથી યુવતી સ્તબ્ધ થઈ ગઈ હતી. આરોપી યુવકનું આ પ્રકારનું હીન કૃત્ય સામે આવતાં જ ભોગ બનનાર યુવતીએ હિંમત દાખવીને તાત્કાલિક સમગ્ર મામલે વસ્ત્રાપુર પોલીસ મથકનો સંપર્ક સાધ્યો હતો.

વસ્ત્રાપુર પોલીસે ગુનો નોંધી આરોપી ડિલિવરી બોયની કરી ધરપકડ

ઘટનાની ગંભીરતાને ધ્યાનમાં રાખીને વસ્ત્રાપુર પોલીસે તાત્કાલિક ધોરણે કાયદેસરનો ગુનો નોંધી કાર્યવાહી શરૂ કરી હતી. પોલીસે ગુનામાં સંમેલિત ફૂડ ડિલિવરી બોયની ઓળખ કરી તેની ટૂંક સમયમાં જ ધરપકડ કરી લીધી છે. વસ્ત્રાપુર પોલીસ દ્વારા આરોપી વિરુદ્ધ આગળની કાયદાકીય તપાસ હાથ ધરવામાં આવી છે અને મહિલાઓની સુરક્ષાને ધ્યાને રાખીને ઘટના અંગે વધુ પુરાવા એકત્ર કરવામાં આવી રહ્યા છે.

આ પણ વાંચો :  India News : પંજાબના ફરાર ડ્રગ્સ સપ્લાયર સામે NCBની આકરી કાર્યવાહી, 2.80 કરોડની મિલકત કરી ફ્રીઝ