દિવાળી નજીક આવતાની સાથે જ હવાઈ મુસાફરી કરતી જનતા માટે ફ્લાઇટ ટિકિટના ભાવમાં તીવ્ર વધારો જોવા મળી રહ્યો છે. સૌથી ચિંતાજનક બાબત એ છે કે તહેવારોની મોસમ પૂરી થયા પછી પણ ટિકિટ સસ્તી થવાની આશા ખૂબ જ ઓછી છે. રજાઓ પૂરી થયા બાદ મુસાફરોની અવરજવરમાં ઘટાડો થવાથી કેટલાક ચોક્કસ રૂટ પર ભાડામાં મામૂલી ઘટાડો થઈ શકે છે, પરંતુ એકંદર ઊંચા ભાડામાંથી મોટી રાહત મળવાની શક્યતા નહિવત છે.

કેટલાક રૂટ પર હવાઈ ભાડામાં 68% સુધીનો તગડો વધારો

એવિએશન ક્ષેત્રના અહેવાલો મુજબ, 1 સપ્ટેમ્બરથી 10 નવેમ્બર વચ્ચેની મુસાફરી માટે સરેરાશ એક-માર્ગી (One-way) હવાઈ ભાડામાં ગયા વર્ષની સરખામણીએ નોંધપાત્ર વધારો થયો છે:

• દિલ્હી – હૈદરાબાદ: ભાડામાં સૌથી વધુ 68% નો વધારો.
• મુંબઈ – કોલકાતા: ભાડામાં 51% નો વધારો.
• દિલ્હી – ગોવા: ભાડામાં 39% નો ઉછાળો.
• મુંબઈ – બેંગલુરુ: ભાડામાં 37% નો વધારો.

આ આંકડા દર્શાવે છે કે દેશના મુખ્ય રૂટ પર પ્રવાસીઓએ મુસાફરી માટે પહેલા કરતાં વધુ ખિસ્સા ખાલી કરવા પડી રહ્યા છે.

ફ્લાઇટ ટિકિટ મોંઘી થવા પાછળના 3 મુખ્ય કારણો

ક્રેડિટ રેટિંગ એજન્સી ICRA ના અહેવાલ મુજબ, હવાઈ ભાડાં આસમાને પહોંચવા પાછળ મુખ્યત્વે નીચેના ત્રણ પરિબળો જવાબદાર છે:

એવિએશન ઇંધણ (ATF) ના ભાવમાં વધારો:

1 ઓક્ટોબરથી સ્થાનિક ATF ના ભાવમાં પ્રતિ લિટર આશરે ₹16 નો વધારો થતાં ભાવ આશરે ₹137 પ્રતિ લિટર પહોંચી ગયો છે. ઓક્ટોબરમાં સ્થાનિક એવિએશન ફ્યુઅલના ભાવ ગયા વર્ષ કરતાં 46.2% વધુ નોંધાયા હતા. એરલાઇન્સના કુલ સંચાલન ખર્ચમાં 30-40% હિસ્સો ઇંધણનો હોવાથી આ બોજ મુસાફરો પર નાખવામાં આવી રહ્યો છે.

ડોલર સામે રૂપિયાની નબળાઈ:

એરલાઇન્સના કુલ ખર્ચમાંથી આશરે 35-50% ખર્ચ (જેમ કે ઇંધણ ખરીદી, વિમાનનું ભાડું અને મેન્ટેનન્સ) ડોલરમાં થાય છે. રૂપિયો નબળો પડવાને કારણે એરલાઇન્સ કંપનીઓનો આંતરિક ખર્ચ વધી ગયો છે.

પશ્ચિમ એશિયામાં ચાલી રહેલો સંઘર્ષ:

મધ્યપૂર્વ/પશ્ચિમ એશિયાના તણાવને કારણે એરસ્પેસ પ્રતિબંધો અને લાંબા વૈકલ્પિક રૂટ અપનાવવા પડે છે, જેથી ઇંધણ અને સંચાલન ખર્ચ વધ્યો છે. આ ઉપરાંત, ઓક્ટોબરથી ડિસેમ્બર વચ્ચે ભારતના સ્થાનિક ફ્લાઇટ શેડ્યૂલમાં ૫% અને સીટની ઉપલબ્ધતામાં ૧.૨% નો ઘટાડો થયો છે.

શું મુસાફરો ઘટવાથી ટિકિટો સસ્તી થશે?

નાણાકીય વર્ષ 2027ના પ્રથમ છ મહિનામાં ભારતમાં ઘરેલુ હવાઈ મુસાફરોના ટ્રાફિકમાં 1.9% અને આંતરરાષ્ટ્રીય મુસાફરોમાં 19.3% નો ઘટાડો નોંધાયો છે. એજન્સીના અંદાજ મુજબ તહેવારો પછી પેસેન્જર ટ્રાફિક ઘટવાથી અમુક રૂટ પર ભાડાં થોડા ઘટી શકે છે. પરંતુ જ્યાં સુધી ઇંધણના ભાવ ઊંચા રહેશે અને ફ્લાઇટની અછત રહેશે, ત્યાં સુધી મોટો ઘટાડો શક્ય નથી.

સરકારના નવા નિયમોથી ટિકિટ સસ્તી થશે કે નહીં?

કેન્દ્ર સરકાર હવાઈ ભાડામાં અચાનક અને મનસ્વી રીતે થતા વધારાને ડામવા માટે નવા નિયમો લાવી રહી છે. આ નિયમો હેઠળ એરલાઇન્સે એક મહિના અગાઉથી તેમનું ભાડું માળખું ‘ડીજીસીએ’ (DGCA) ને સબમિટ કરવું પડશે અને પોતાની વેબસાઇટ પર મૂકવું પડશે. સુપ્રીમ કોર્ટે કેન્દ્ર સરકારને 16 નવેમ્બર સુધીમાં આ અંતિમ નિયમો રજૂ કરવા આદેશ આપ્યો છે. આ નિયમો ટિકિટના ભાવ નક્કી કરવા માટે કે ભાડાં ઘટાડવા માટે નથી, પરંતુ માત્ર મનસ્વી વધારા પર નજર રાખવા માટે છે. તેથી તહેવારો દરમિયાન ટિકિટ સસ્તી થવાની કોઈ ગેરંટી આ નિયમોથી મળતી નથી.

આ પણ વાંચો : Auto માર્કેટમાં નવા અંદાજ અને આધુનિક ફીચર્સ સાથે લોન્ચ થઈ આ નવી રફ-એન્ડ-ટફ SUV!