ભારતીય ક્રિકેટ ટીમના ચીફ સિલેક્ટર તરીકે અજિત અગરકરનો કાર્યકાળ હવે પૂરો થઈ ગયો છે. અગરકરે જુલાઈ 2023માં આ જવાબદારી સંભાળી હતી અને 4 ઓક્ટોબર 2026એ તેમનો કાર્યકાળ પૂરો થયો. હવે BCCIએ નવા સિલેક્ટર માટે અરજી મંગાવી છે અને પ્રજ્ઞાન ઓઝા વચગાળાના ચીફ સિલેક્ટર તરીકે જવાબદારી સંભાળી રહ્યા છે. અગરકરના કાર્યકાળને ભારતીય ક્રિકેટના પરિણામોની દૃષ્ટિએ ખાસ માનવામાં આવે છે. આ સમયગાળામાં ભારતે 3 ICC ટ્રોફી, 2 એશિયા કપ અને એશિયન ગેમ્સમાં ગોલ્ડ સહિત અનેક મોટી સિદ્ધિઓ મેળવી.

2024માં 11 વર્ષનો ICC ટ્રોફીનો દુકાળ ખતમ થયો

અગરકર ચીફ સિલેક્ટર બન્યા બાદ ભારતની સૌથી મોટી સફળતા 2024 T20 વર્લ્ડ કપમાં આવી. રોહિત શર્માની આગેવાની હેઠળ ભારતીય ટીમે આખી ટૂર્નામેન્ટમાં એક પણ મેચ હાર્યા વગર ફાઇનલમાં દક્ષિણ આફ્રિકાને હરાવીને ટ્રોફી જીતી હતી. આ જીત સાથે ભારતનો 2013 પછીનો ICC ટ્રોફીનો લાંબો ઇંતજાર ખતમ થયો. આ ટૂર્નામેન્ટમાં ટીમની પસંદગી અને ખેલાડીઓની ભૂમિકાને લઈને સિલેક્ટર્સની ભૂમિકા પણ મહત્વની રહી હતી.

2025માં ચેમ્પિયન્સ ટ્રોફી અને એશિયા કપ

2025માં ભારતે પોતાની સફળતાનો સિલસિલો ચાલુ રાખ્યો. ટીમે ચેમ્પિયન્સ ટ્રોફી જીતીને સતત બીજી મોટી ICC ટ્રોફી પોતાના નામે કરી. ભારતે ફાઇનલમાં ન્યૂઝીલેન્ડને હરાવ્યું હતું. આ જ સમયગાળામાં ભારતે 2025નો એશિયા કપ પણ જીત્યો. આ રીતે અગરકરના કાર્યકાળમાં ભારતે ODI અને T20 બંને ફોર્મેટમાં એશિયા કપની ટ્રોફી જીતી. 2023માં ભારતે ODI એશિયા કપ અને 2025માં T20 એશિયા કપ જીત્યો હતો.

2026માં ફરી T20 વર્લ્ડ કપ જીત્યો

અગરકરના કાર્યકાળની સૌથી મોટી સિદ્ધિઓમાં 2026 T20 વર્લ્ડ કપનો પણ સમાવેશ થાય છે. ભારતે પોતાના ઘરઆંગણે રમાયેલી આ ટૂર્નામેન્ટ જીતીને ઇતિહાસ રચ્યો. આ જીત સાથે ભારત સતત બે T20 વર્લ્ડ કપ જીતનાર પ્રથમ પુરુષ ટીમ બની. 2024 બાદ 2026માં પણ T20 વર્લ્ડ કપ જીતવાથી અગરકરના કાર્યકાળમાં ભારતના ICC ટાઇટલની સંખ્યા 3 થઈ.

2023 એશિયન ગેમ્સમાં પણ ભારતને ગોલ્ડ

અગરકરના કાર્યકાળ દરમિયાન ભારતીય ક્રિકેટ ટીમે એશિયન ગેમ્સમાં પણ સફળતા મેળવી. 2023ના હાંગઝોઉ એશિયન ગેમ્સમાં ઋતુરાજ ગાયકવાડની આગેવાની હેઠળ ભારતે પુરુષોની T20 ક્રિકેટમાં ગોલ્ડ મેડલ જીત્યો હતો. આ ઉપરાંત 2023 ODI વર્લ્ડ કપમાં પણ ભારત ફાઇનલ સુધી પહોંચ્યું હતું. સમગ્ર ટૂર્નામેન્ટમાં ભારતે શાનદાર પ્રદર્શન કર્યું હતું, જોકે અમદાવાદમાં રમાયેલી ફાઇનલમાં ઓસ્ટ્રેલિયા સામે હાર મળી હતી.

અગરકરના કાર્યકાળમાં ભારતની 8 મોટી સિદ્ધિઓ

અગરકરના કાર્યકાળ દરમિયાન ભારતે 2023 એશિયન ગેમ્સમાં ગોલ્ડ, 2023 એશિયા કપ, 2023 ODI વર્લ્ડ કપની ફાઇનલ, 2024 T20 વર્લ્ડ કપ, 2025 ચેમ્પિયન્સ ટ્રોફી, 2025 એશિયા કપ અને 2026 T20 વર્લ્ડ કપ અને 2026 એશિયન ગેમ્સના પુરુષોની T20 ક્રિકેટમાં ગોલ્ડનો સમાવેશ છે.

હવે અગરકર ચીફ સિલેક્ટર તરીકે નથી. BCCIએ તેમની જગ્યાએ નવી પસંદગી સમિતિ માટે પ્રક્રિયા શરૂ કરી છે. જોકે, તેમના કાર્યકાળને જોવામાં આવે તો ભારતીય ક્રિકેટ ટીમે ખાસ કરીને વ્હાઇટ-બોલ ક્રિકેટમાં મોટી ટ્રોફીઓનો સિલસિલો જાળવી રાખ્યો હતો.

આ પણ વાંચો: IPL 2027 પહેલાં થશે મોટો ટ્રેડ! અભિષેક શર્માને ખરીદવા 3 ટીમો રેસમાં