ઈ-કોમર્સ કંપની એમેઝોને ફરી એકવાર કર્મચારીઓની છટણી કરી છે. કંપનીએ તેના રિટેલ બિઝનેસ સાથે જોડાયેલા વિભાગોમાં અંદાજે 1,000 જેટલા કર્મચારીઓને નોકરીમાંથી હટાવ્યા છે. આ છટણીની અસર અમેરિકા ઉપરાંત ભારત અને બ્રિટનમાં કામ કરતા કર્મચારીઓ પર પણ પડી છે.
હાલમાં કંપનીની મોટી શોપિંગ ઇવેન્ટ પ્રાઇમ બિગ ડીલ ડેઝ ચાલી રહ્યું છે અને તે દરમિયાન જ એમેઝોને છટણીની જાહેરાત કરી છે. કંપનીએ તેના રિટેલ બિઝનેસમાં કર્મચારીઓની સંખ્યા ઘટાડવાનો નિર્ણય લીધો છે.
એમેઝોને શા માટે કરી છટણી?
એમેઝોનના જણાવ્યા અનુસાર, કંપનીએ તેના રિટેલ બિઝનેસના કેટલાક વિભાગોમાં ફેરફાર કર્યા છે. કંપનીનું કહેવું છે કે નવા માળખા સાથે તે વધુ સારી રીતે કામ કરી શકશે. એટલે કે કંપની પોતાની કામ કરવાની પદ્ધતિ અને ટીમના માળખાને ફરીથી ગોઠવી રહી છે.
અહેવાલ અનુસાર, આ છટણીથી રિટેલ વિભાગના અલગ-અલગ ભાગોને અસર થઈ છે. તેમાં ગ્રાહક સેવા અને સેલિંગ પાર્ટનર સર્વિસિસ જેવા વિભાગોનો પણ સમાવેશ થાય છે. જોકે, કંપનીએ કયા દેશમાં કેટલા કર્મચારીઓની નોકરી ગઈ છે તેની ચોક્કસ માહિતી આપી નથી.
ભારત પર કેટલી અસર પડી?
આ છટણીમાં ભારતમાં કામ કરતા એમેઝોનના કર્મચારીઓનો પણ સમાવેશ થાય છે. જોકે, ભારતમાં કુલ કેટલા કર્મચારીઓને નોકરીમાંથી હટાવવામાં આવ્યા છે તે હજુ સ્પષ્ટ નથી.
અમેરિકા, ભારત અને બ્રિટનમાં મળીને અંદાજે 1,000 જેટલા વ્હાઇટ-કોલર કર્મચારીઓ પર તેની અસર પડી છે.
અગાઉ ક્યારે થઈ હતી છટણી?
એમેઝોનમાં આ પહેલીવાર નથી જ્યારે મોટી સંખ્યામાં કર્મચારીઓની છટણી કરવામાં આવી હોય. કંપની અગાઉ પણ કર્મચારીઓની સંખ્યા ઘટાડી ચૂકી છે.
ગયા વર્ષે શરૂ થયેલી મોટી છટણીમાં આશરે 30,000 નોકરીઓ ખતમ કરવામાં આવી હતી અને તેની અસર જાન્યુઆરી સુધી જોવા મળી હતી. ત્યાર બાદ પણ કંપનીએ અલગ-અલગ વિભાગોમાં નાની-મોટી છટણી ચાલુ રાખી છે.
એમેઝોનના સ્થાપક અને એક્ઝિક્યુટિવ ચેરમેન Jeff Bezosએ પણ તાજેતરમાં કંપનીની છટણી અંગે વાત કરી છે. તેમણે કહ્યું હતું કે કોરોના મહામારી દરમિયાન ઓનલાઈન શોપિંગની માંગમાં ઝડપથી વધારો થયો હતો અને તે સમયે કંપનીએ મોટી સંખ્યામાં લોકોને નોકરી પર રાખ્યા હતા. હવે કંપની તે વધેલા વર્કફોર્સને હાલની જરૂરિયાત મુજબ ગોઠવી રહી છે.
શું એમેઝોનમાં હજુ વધુ છટણી થશે?
હાલમાં એમેઝોને આગામી સમયમાં કેટલા કર્મચારીઓની છટણી કરવામાં આવશે તે અંગે કોઈ નવો આંકડો આપ્યો નથી. કંપનીનું કહેવું છે કે રિટેલ બિઝનેસમાં કરવામાં આવેલા ફેરફારોનો હેતુ સંગઠનને વધુ અસરકારક બનાવવાનો છે.