અમરેલી જિલ્લાના ધારી વિસ્તારમાંથી એક અત્યંત કરુણ અને હૃદયદ્રાવક ઘટના સામે આવી છે. ધારીમાંથી પસાર થતી હેમરાજીયા નદી નજીકથી 13 વર્ષીય માસૂમ બાળકી અંજલિ અજયભાઈ ચીખલીયા પસાર થઈ રહી હતી. તે સમયે અચાનક નદીના કાંઠેથી તેનો પગ લપસી ગયો હતો. પગ લપસવાના કારણે અંજલિ સીધી હેમરાજીયા નદીના ઉંડા પાણીમાં ખાબકી હતી અને જોતજોતામાં ડૂબવા લાગી હતી.

સ્થાનિકોએ બાળકીનો મૃતદેહ બહાર કાઢ્યો

બાળકી ડૂબતી હોવાની જાણ થતાં જ આસપાસના સ્થાનિક લોકો ત્વરિત મદદ અર્થે નદી કિનારે દોડી આવ્યા હતા. સ્થાનિકોએ નદીના પાણીમાં ઉતરીને ભારે મશક્કત બાદ બાળકીને બહાર કાઢી હતી, પરંતુ કમનસીબે ઉંડા પાણીમાં ડૂબી જવાના કારણે 13 વર્ષીય અંજલિનું ઘટનાસ્થળે જ કરુણ મોત નીપજ્યું હતું. માસૂમ બાળકીના અકાળે અવસાનથી પરિવારજનોમાં ઘેરા શોકની કાલિમા છવાઈ ગઈ છે.

ધારી સરકારી હોસ્પિટલ ખાતે પીએમ અર્થે મૃતદેહ ખસેડાયો

ઘટના અંગેની જાણ થતાં જ ધારી પોલીસ સ્ટેશનનો કાફલો તાત્કાલિક સ્થળ પર પહોંચી ગયો હતો. પોલીસે બાળકીના મૃતદેહનો કબજો મેળવીને કાયદેસરની કાર્યવાહી હાથ ધરી હતી અને મૃતદેહને પોસ્ટમોર્ટમ (P.M.) અર્થે ધારી સરકારી હોસ્પિટલ ખાતે ખસેડવામાં આવ્યો હતો. પોલીસે અકસ્માતે મોત અંગેનો ગુનો નોંધી આગળની વધુ તપાસ હાથ ધરી છે.

ગુજરાતના વધુ સમાચાર વાંચવા માટે ક્લિક કરો