અમરેલી જિલ્લામાં વાતાવરણમાં અચાનક પલટો જોવા મળ્યો છે, જેના કારણે જિલ્લાના અનેક વિસ્તારોમાં કમોસમી વરસાદ નોંધાયો છે. ખાસ કરીને ખાંભા ગીરના ગ્રામ્ય વિસ્તારોમાં ધોધમાર પવન અને આકાશમાં વીજળીના કડાકા-ભડાકા સાથે વરસાદી માહોલ જામ્યો હતો. હવામાનમાં આવેલા આ અચાનક ફેરફાર અને વાવાઝોડાની અસરને કારણે ખેડૂતો અને ગ્રામજનો ચિંતામાં મૂકાયા હતા, પરંતુ આ કુદરતી આપત્તિ એક પરિવાર માટે વજ્રઘાત સમાન સાબિત થઈ હતી.

ચકરાવા ગામે વાડીમાં ખેતીકામ દરમિયાન દુર્ઘટના

ખાંભા તાલુકાના ચકરાવા ગામે રહેતા રામભાઈ ભુવાની વાડીએ મજૂરી અને ખેતીકામ અર્થે માધીબેન આતુભાઈ મકવાણા ગયા હતા. તેઓ વાડીમાં ખેતીનું કામ કરી રહ્યા હતા, તે દરમિયાન અચાનક આકાશમાંથી વીજળી ત્રાટકી હતી. ખેતીકામમાં વ્યસ્ત રહેલા માધીબેન પર સીધી વીજળી પડવાને કારણે તેમને ગંભીર ઇજાઓ પહોંચી હતી અને તેઓ ઘટના સ્થળે જ અચેત થઈ ગયા હતા.

હોસ્પિટલ પહોંચાડતા તબીબોએ મૃત જાહેર કર્યા

ઘટનાની જાણ થતા જ આસપાસના લોકો તાત્કાલિક દોડી આવ્યા હતા અને ઇજાગ્રસ્ત વૃદ્ધાને તાત્કાલિક સારવાર અર્થે ખાંભાની સરકારી હોસ્પિટલ ખાતે ખસેડવામાં આવ્યા હતા. જોકે, હોસ્પિટલ પહોંચતા જ ફરજ પરના તબીબે તપાસીને માધીબેન મકવાણાને મૃત જાહેર કર્યા હતા. અચાનક બનેલી આ આકસ્મિક દુર્ઘટનાને કારણે મૃતકના પરિવારમાં આક્રંદ છવાઈ ગયો છે, અને સમગ્ર પંથકમાં શોકનું મોજુ ફરી વળ્યું છે.

<a href="

=” target=”_blank”>

=

આ પણ વાંચો: Amreliના ખાંભા ગીરમાં માવઠાનો માર, કમોસમી વરસાદ અને ઝડપી પવનથી ખેડૂતોની ચિંતામાં મોટો વધારો!