અમરેલી જિલ્લાના રાજુલા તાલુકાના બારપટોળી ગામની સીમમાં સિંહ દ્વારા વનવિભાગના કર્મચારીઓ ઉપર હુમલો કરવામાં આવ્યો હોવાની ઘટનાએ પહેલેથી જ ચકચાર જગાવી હતી. પરંતુ હવે આ મામલે એક અત્યંત ચોંકાવનારો અને ગંભીર ખુલાસો સામે આવ્યો છે. મધરાત્રિના સમયે જ્યારે સિંહે વનકર્મીઓ પર હુમલો કર્યો ત્યારે નાસભાગ અને અફરાતફરીના માહોલ વચ્ચે વન વિભાગના અધિકારીની અંગત સલામતીને લગતી મોટી મૂંઝવણ ઊભી થઈ હતી, જેને લઈને સમગ્ર વહીવટી તંત્રમાં દોડધામ મચી ગઈ છે.

ફોરેસ્ટરની પ્રાઇવેટ રિવોલ્વર અને 6 કારતૂસ અંધારામાં પડી ગયા

પ્રાપ્ત વિગતો અનુસાર, આ હુમલાની ઘટના વખતે ફોરેસ્ટર એમ.જે. ખાવડિયા પાસે રહેલી પોતાની પ્રાઇવેટ રિવોલ્વર સિંહના હુમલા અને ભાગદોડ દરમિયાન ક્યાંક પડી ગઈ હતી. માત્ર રિવોલ્વર જ નહીં પરંતુ તેની સાથે રહેલા 6 કારતૂસ પણ અંધારામાં ખોવાઈ ગયા હોવાનું સામે આવ્યું છે. વન્યપ્રાણીના આક્રમણ વચ્ચે બચેલા કર્મચારીઓ માટે આ ઘટના જીવના જોખમ સમાન સાબિત થઈ હતી, પરંતુ હથિયાર અજાણ્યા સ્થળે પડી જવાથી હવે સુરક્ષા અને કાયદાકીય પાસાંઓને લઈને ગંભીર સવાલો ઊભા થયા છે.

રાજુલા પોલીસને જાણ કરાતા શોધખોળ હાથ ધરાઈ

આ ગંભીર ઘટનાની જાણ થતાં જ વન વિભાગના ઉચ્ચ અધિકારીઓ અને સ્થાનિક પોલીસ સફાળી જાગી છે. ફોરેસ્ટર દ્વારા તાત્કાલિક રાજુલા પોલીસ સ્ટેશનને આ અંગે જાણ કરવામાં આવી છે, જેના પગલે પોલીસ દ્વારા બારપટોળીની સીમના તે વિસ્તારમાં રિવોલ્વર અને કારતૂસની શોધખોળ માટે સઘન તપાસ શરૂ કરવામાં આવી છે. મધરાત્રિની આ ઘટનામાં હથિયાર કઈ જગ્યાએ અને કઈ હાલતમાં પડ્યું છે તે શોધવા માટે પોલીસ અને વનકર્મીઓ કામે લાગ્યા છે.

આ પણ વાંચો : Gandhinagarમાં વિદ્યાર્થીઓનો રૌદ્ર અવતાર, ખરાબ ભોજન અને પાણીની સમસ્યા સામે સમરસ હોસ્ટેલના છાત્રો પહોંચ્યા સચિવાલય!