આણંદ જિલ્લાના પેટલાદ ખાતે સાયબર ઠગાઈનો એક અત્યંત ચોંકાવનારો કિસ્સો સામે આવ્યો છે, જેમાં સાયબર ક્રિમિનલ્સે 70 વર્ષીય વૃદ્ધ વકીલને પોતાનો શિકાર બનાવ્યા હતા. ઠગોએ પોતાની ઓળખ ‘ATS મહારાષ્ટ્ર’ના અધિકારી તરીકે આપીને વકીલને ગંભીર કાયદાકીય કેસમાં ફસાવી દેવાની ધમકી આપી હતી. આ ઉપરાંત, પીડિત પર માનસિક દબાણ વધારવા અને ભયનું વાતાવરણ ઊભું કરવા માટે બોગસ આરબીઆઈ (RBI) નો લેટર પણ દર્શાવવામાં આવ્યો હતો. ગિરફ્તારીનો ભારે ડર બતાવી ઠગોએ વકીલને ‘ડિજિટલ અરેસ્ટ’ કર્યા હતા અને તેમની પાસેથી કટકે-કટકે કુલ રૂ. 70 લાખની માતબર રકમ પડાવી લીધી હતી.

વડોદરા અને અમદાવાદમાંથી બે સાયબર ઠગોની ધરપકડ

આટલી મોટી રકમ ગુમાવ્યા બાદ વકીલને પોતાની સાથે ગંભીર છેતરપિંડી થઈ હોવાનો અહેસાસ થતાં તેમણે તાત્કાલિક સાયબર ક્રાઇમ પોલીસ મથકે ફરિયાદ નોંધાવી હતી. ઘટનાની ગંભીરતાને ધ્યાને લઈને પોલીસે ટેકનિકલ સર્વેલન્સ અને બેંક એકાઉન્ટ ડિટેલ્સના આધારે સઘન તપાસ હાથ ધરી હતી. પોલીસે ગણતરીના સમયમાં જ આંતર-જિલ્લા કનેક્શન શોધી કાઢીને બે આરોપીઓની ધરપકડ કરી લીધી છે. ઝડપાયેલા આરોપીઓમાં વડોદરાના કેયુર પ્રજાપતિ અને અમદાવાદના પિનાંક બાવીસીનો સમાવેશ થાય છે.

આરોપીઓના રિમાન્ડ મંજૂર, અન્ય તાર શોધવા તપાસ તેજ

ધરપકડ બાદ પોલીસે વડોદરાના આરોપી કેયુર પ્રજાપતિને કોર્ટમાં રજૂ કરીને 3 દિવસના પોલીસ રિમાન્ડ મેળવ્યા છે, જ્યારે અમદાવાદના આરોપી પિનાંક બાવીસીની ધરપકડ કરી તેના પણ રિમાન્ડ મેળવવાની કાયદેસરની પ્રક્રિયા હાથ ધરી છે. આ ડિજિટલ અરેસ્ટ કૌભાંડમાં અન્ય કેટલા આરોપીઓ સંકળાયેલા છે અને પડાવેલા 70 લાખ રૂપિયા કયા-કયા બેંક એકાઉન્ટ્સમાં ટ્રાન્સફર કરવામાં આવ્યા હતા તે દિશામાં પોલીસ ઊંડાણપૂર્વક તપાસ કરી રહી છે. આ ઘટનાને પગલે પોલીસે નાગરિકોને અજાણ્યા કૉલ કે ‘ડિજિટલ અરેસ્ટ’ની ધમકીઓથી ન ડરવા અને તુરંત જ સાયબર હેલ્પલાઇન 1930 પર સંપર્ક કરવા અપીલ કરી છે.

આ પણ વાંચો : Bhavnagarમાં વિદેશી દારૂની બનાવટી ફેક્ટરી ઝડપાઈ, LCB એ રેલવે કર્મચારી સહિત 3 ની કરી ધરપકડ!