ભારતીય ક્રિકેટર અર્શદીપ સિંહ માટે 11 નવેમ્બર, 2026નો દિવસ યાદગાર બની ગયો છે. એક જ દિવસે તેને અંગત જીવન અને ક્રિકેટ કારકિર્દી બંનેમાં મોટી ખુશી મળી છે. અર્શદીપે અભિનેત્રી અને મોડલ સમરીન કૌર સાથે સગાઈ કરી હોવાની જાહેરાત કરી છે. આ સાથે જ IPL 2027 પહેલાં તેનો પંજાબ કિંગ્સમાંથી મુંબઈ ઇન્ડિયન્સમાં ₹18 કરોડની ડીલ સાથે ટ્રેડ પણ પૂર્ણ થયો છે. એટલે કે એક તરફ જીવનસાથી સાથે નવી સફરની શરૂઆત અને બીજી તરફ IPLમાં નવી ટીમ સાથે નવી ઇનિંગ.

સમરીન સાથે સગાઈની ખુશખબર

અર્શદીપ સિંહ અને સમરીન કૌરે 11 નવેમ્બરે સોશિયલ મીડિયા પર સગાઈની તસવીરો શેર કરી હતી. બંનેએ પોતાની ખુશી ચાહકો સાથે વહેંચતાં એક ભાવુક સંદેશ પણ લખ્યો હતો. તેમણે લખ્યું હતું, “જીવન મને ઘણી બધી વસ્તુઓ આપી શક્યું હોત, પરંતુ એકબીજાને મળ્યા એ સૌથી વધુ ખુશીની વાત છે. જીવનભર સાથે રહેવા માટે.” પોસ્ટમાં 11.11.2026ની તારીખ સાથે ‘હાય ફિયાન્સે’ પણ લખવામાં આવ્યું હતું. તસવીરોમાં અર્શદીપ સમરીનને વીંટી પહેરાવતો જોવા મળે છે. પોસ્ટ સામે આવ્યા બાદ ક્રિકેટપ્રેમીઓ અને ચાહકોએ બંનેને શુભેચ્છાઓ પાઠવી હતી. ભારતીય ઓલરાઉન્ડર હાર્દિક પંડ્યાએ પણ બંનેને અભિનંદન આપ્યા હતા.

જુલાઈમાં સંબંધને જાહેર કર્યો હતો

અર્શદીપ અને સમરીનના સંબંધની ચર્ચા IPL 2026 દરમિયાન શરૂ થઈ હતી. સમરીન પંજાબ કિંગ્સની કેટલીક મેચોમાં જોવા મળી હતી. ત્યારબાદ બંનેની સાથેની તસવીરો અને વીડિયો સોશિયલ મીડિયા પર ચર્ચામાં આવ્યા હતા. જુલાઈ 2026માં અર્શદીપે સમરીન સાથેની તસવીરો શેર કરીને પોતાના સંબંધને જાહેર કર્યો હતો. તેણે પોસ્ટમાં ‘માય પર્સન’ લખ્યું હતું. ત્યારથી બંનેના સંબંધની ચર્ચા ચાલી રહી હતી. હવે બંનેએ સગાઈ કરીને આ સંબંધને નવું નામ આપ્યું છે.

કોણ છે સમરીન કૌર?

સમરીન કૌર અભિનેત્રી અને મોડલ છે. તે જમ્મુ-કાશ્મીર સાથે સંબંધ ધરાવે છે. તેણે ફેમિના મિસ ઇન્ડિયા 2018 સ્પર્ધામાં જમ્મુ-કાશ્મીરનું પ્રતિનિધિત્વ કર્યું હતું અને ફાઇનલિસ્ટ બની હતી. સમરીન ફિલ્મ ‘83’ અને પંજાબી ફિલ્મ ‘સરદાર જી 2’માં જોવા મળી છે. આ ઉપરાંત તેણે અનેક મ્યુઝિક વીડિયોમાં પણ કામ કર્યું છે. ગુરુ રંધાવા, બાદશાહ અને જુબિન નૌટિયાલ જેવા ગાયકોનાં મ્યુઝિક વીડિયોમાં પણ તે જોવા મળી છે.

₹18 કરોડમાં મુંબઈ ઇન્ડિયન્સમાં એન્ટ્રી

અર્શદીપ માટે આ દિવસ ક્રિકેટની દૃષ્ટિએ પણ મોટો રહ્યો. IPL 2027 પહેલાં મુંબઈ ઇન્ડિયન્સ અને પંજાબ કિંગ્સ વચ્ચે ખેલાડીઓની અદલાબદલી થઈ છે. આ ટ્રેડમાં મુંબઈનો ઓલરાઉન્ડર હાર્દિક પંડ્યા પંજાબ કિંગ્સમાં ગયો છે, જ્યારે અર્શદીપ મુંબઈ ઇન્ડિયન્સમાં જોડાયો છે. અર્શદીપ મુંબઈમાં તેની હાલની ₹18 કરોડની ફી પર જ જોડાશે. બીજી તરફ હાર્દિક પંડ્યા ₹16.35 કરોડની જૂની ફીમાંથી વધીને ₹18 કરોડની ફી પર પંજાબ કિંગ્સમાં જશે. અર્શદીપે 2019માં પંજાબ કિંગ્સ તરફથી IPLમાં પદાર્પણ કર્યું હતું. આઠ સિઝન સુધી ટીમ સાથે રહ્યા બાદ હવે તે નવી ટીમ તરફથી રમશે. પંજાબ માટે તેણે 96 મેચમાં 111 વિકેટ લીધી છે. તે ફ્રેન્ચાઇઝીનો સૌથી વધુ વિકેટ લેનારો બોલર છે.

મુંબઈને મળશે બુમરાહ સાથે મજબૂત જોડી

અર્શદીપના મુંબઈ ઇન્ડિયન્સમાં આવવાથી ટીમની ફાસ્ટ બોલિંગ વધુ મજબૂત બની શકે છે. ખાસ કરીને ડાબોડી ફાસ્ટ બોલર તરીકે તે નવી બોલથી શરૂઆતમાં વિકેટ અપાવી શકે છે અને ડેથ ઓવર્સમાં પણ ઉપયોગી સાબિત થઈ શકે છે. મુંબઈ પાસે પહેલેથી જ જસપ્રીત બુમરાહ જેવા અનુભવી ફાસ્ટ બોલર છે. હવે અર્શદીપના આવવાથી બંનેની જોડી IPL 2027માં વિરોધી ટીમો માટે મોટો પડકાર બની શકે છે.

આમ, અર્શદીપ સિંહ માટે 11 નવેમ્બરનો દિવસ બેવડી ખુશી લઈને આવ્યો છે. એક તરફ સમરીન કૌર સાથે જીવનભરની સફરની શરૂઆત થઈ છે, તો બીજી તરફ મુંબઈ ઇન્ડિયન્સ સાથે નવી ક્રિકેટ સફર શરૂ થવાની છે.

આ પણ વાંચો: Sandpapergate: ‘પુસ્તક વેચવા માટે 8 વર્ષ જૂની વાત ઉખેડી!’ ઉસ્માન ખ્વાજા પર આકાશ ચોપરાનો પ્રહાર