એશિયન ગેમ્સ 2026માં ભારતીય મહિલા ક્રિકેટ ટીમે શ્રીલંકાને હરાવીને ગોલ્ડ મેડલ જીત્યા બાદ હવે પુરુષ ટીમના અભિયાન પર નજર રહેશે.શ્રેયસ અય્યરની આગેવાની હેઠળની ભારતીય ટીમ 28 સપ્ટેમ્બરે એશિયન ગેમ્સમાં પોતાની પ્રથમ મેચ રમશે. ભારતને સીધું ક્વાર્ટર ફાઇનલમાં સ્થાન મળ્યું છે.ભારતીય મહિલા ટીમે 22 સપ્ટેમ્બરે શ્રીલંકાને હરાવીને ગોલ્ડ મેડલ જીત્યો હતો.હવે પુરુષ ટીમ પણ એશિયન ગેમ્સમાં ભારત માટે મેડલ મેળવવાના અભિયાનને આગળ વધારશે. પુરુષોની T20 ક્રિકેટ સ્પર્ધા 24 સપ્ટેમ્બરથી શરૂ થશે અને 3 ઓક્ટોબરે ફાઇનલ રમાશે.
ભારતે એશિયન ગેમ્સ પહેલાં જાપાન સામે મેચ રમી
એશિયન ગેમ્સના મુખ્ય મુકાબલા પહેલાં ભારતે 22 સપ્ટેમ્બરે જાપાન સામે એક T20I મેચ રમી હતી.વરસાદ અને મેદાન ભીનું હોવાના કારણે મેચને 5-5 ઓવરની કરવામાં આવી હતી.ભારતે પ્રથમ બેટિંગ કરીને 32 રન બનાવ્યા હતા, જ્યારે જાપાનની ટીમ 30 રન બનાવી શકી હતી.આ રીતે ભારતે 2 રનથી જીત મેળવી હતી.આ મુકાબલો ભારત માટે ખાસ રહ્યો કારણ કે જાપાન સામેનો આ મુકાબલો બંને દેશો વચ્ચેનો પ્રથમ પુરુષ T20I હતો.હવે એશિયન ગેમ્સમાં ભારતીય ટીમ માટે મુખ્ય સ્પર્ધા શરૂ થશે.
24 સપ્ટેમ્બરથી પુરુષ ક્રિકેટની શરૂઆત
એશિયન ગેમ્સમાં પુરુષોની T20 ક્રિકેટ સ્પર્ધાની શરૂઆત 24 સપ્ટેમ્બરે થશે. પ્રથમ દિવસે જાપાન અને અફઘાનિસ્તાન વચ્ચે મેચ રમાશે. આ મેચ સવારે 5:30 વાગ્યે ભારતીય સમય મુજબ શરૂ થશે. એ જ દિવસે હોંગકોંગ અને મલેશિયા વચ્ચે પણ મુકાબલો થશે.ગ્રુપ સ્ટેજમાં કુલ 6 ટીમો ભાગ લઈ રહી છે. ગ્રુપ Aમાં અફઘાનિસ્તાન, જાપાન અને નેપાળ છે,જ્યારે ગ્રુપ Bમાં હોંગકોંગ,મલેશિયા અને ઓમાનનો સમાવેશ થાય છે. દરેક ગ્રુપમાંથી ટોચની 2 ટીમો ક્વાર્ટર ફાઇનલમાં પહોંચશે ભારત,પાકિસ્તાન,શ્રીલંકા અને બાંગ્લાદેશને સીધું ક્વાર્ટર ફાઇનલમાં સ્થાન આપવામાં આવ્યું છે.
28 સપ્ટેમ્બરે ભારતનો ક્વાર્ટર ફાઇનલ મુકાબલો
ભારતીય ટીમ 28 સપ્ટેમ્બરે સવારે 10:30 વાગ્યે ક્વાર્ટર ફાઇનલ મેચ રમશે.ભારતનો સામનો ગ્રુપ Aમાં બીજા સ્થાને રહેનારી ટીમ સામે થશે.હાલમાં ભારતના વિરોધીનું નામ નક્કી થયું નથી,કારણ કે ગ્રુપ સ્ટેજની મેચો બાદ જ તે નક્કી થશે.એ જ દિવસે પાકિસ્તાન પણ ક્વાર્ટર ફાઇનલ રમશે.પાકિસ્તાનની મેચ ભારતીય સમય મુજબ સવારે 5:30 વાગ્યે શરૂ થશે અને તેનો સામનો ગ્રુપ Bમાં બીજા સ્થાને રહેનારી ટીમ સામે થશે.
એશિયન ગેમ્સ પુરુષ ક્રિકેટનું શેડ્યૂલ
- 24 સપ્ટેમ્બર:જાપાન vs અફઘાનિસ્તાન – સવારે 5:30
- 24 સપ્ટેમ્બર:હોંગકોંગ vs મલેશિયા – સવારે 10:30
- 25 સપ્ટેમ્બર:હોંગકોંગ vs ઓમાન – સવારે 5:30
- 25 સપ્ટેમ્બર:અફઘાનિસ્તાન vs નેપાળ – સવારે 10:30
- 26 સપ્ટેમ્બર:જાપાન vs નેપાળ – સવારે 5:30
- 26 સપ્ટેમ્બર:મલેશિયા vs ઓમાન – સવારે 10:30
- 28 સપ્ટેમ્બર:પાકિસ્તાન ક્વાર્ટર ફાઇનલ – સવારે 5:30
- 28 સપ્ટેમ્બર:ભારત ક્વાર્ટર ફાઇનલ – સવારે 10:30
- 1 ઓક્ટોબર:સેમિફાઇનલ
- 3 ઓક્ટોબર:બ્રોન્ઝ મેડલ મેચ અને ફાઇનલ
આ પણ વાંચો – Team Indiaનો વર્લ્ડ રેકોર્ડ,T20Iમાં 200 જીત મેળવનારી દુનિયાની પ્રથમ ટીમ બની