FSSAI: બાળકો માટે ઉપયોગમાં લેવાતા ફોર્મ્યુલા ફૂડને લઈને ભારતીય ખાદ્ય સુરક્ષા અને ધોરણ પ્રાધિકરણ (FSSAI)એ Nestlé India સામે કાર્યવાહી કરી છે. FSSAIએ કંપની સામે ત્રણ અલગ-અલગ એડજ્યુડિકેશન કેસ દાખલ કર્યા છે. તપાસમાં પ્રોડક્ટના પ્રમોશન અને એક ફોર્મ્યુલા ફૂડના પોષણ સંબંધિત ધોરણોમાં કથિત ગેરરીતિ સામે આવી છે.
પ્રમોશન પર લગાવવામાં આવી રોક
FSSAIએ આ દાવાઓ અંગે Nestlé India પાસેથી સ્પષ્ટતા માંગી છે. તપાસ દરમિયાન બંને પ્રોડક્ટના પ્રમોશનને Food Safety and Standards (Food for Infant Nutrition) Regulation 2020ના નિયમ 4(2)ની જોગવાઈ વિરુદ્ધ હોવાનું જાણવા મળ્યું. આ નિયમ હેઠળ શિશુ આહારનું વેચાણ વધારવા માટે કરવામાં આવતા કેટલાક પ્રમોશન અને દાવા પર પ્રતિબંધ છે. આ ઉપરાંત Infant Milk Substitutes Act, 1992ની કલમ 3 હેઠળ પણ આવા પ્રોડક્ટના જાહેરાત અને પ્રમોશન પર પ્રતિબંધ મૂકવામાં આવ્યો છે.
બે પ્રોડક્ટના પ્રમોશનમાં નિયમ વિરુદ્ધ દાવા
FSSAIના જણાવ્યા અનુસાર, Nestlé Indiaના બે પ્રોડક્ટના પ્રમોશનમાં એવા દાવા જોવા મળ્યા, જેને નિયમોનું ઉલ્લંઘન માનવામાં આવ્યું છે. તેમાં NAN Excella Pro Stage 1 અને Lactogen Pro 1નો સમાવેશ થાય છે. તપાસમાં NAN Excella Pro Stage 1ના પ્રમોશનમાં ‘5 HMOs’ અને ‘Whey Protein’ સાથે જોડાયેલા દાવા જોવા મળ્યા હતા. જ્યારે Lactogen Pro 1ના પ્રમોશનમાં ‘Whey Protein being easy to digest’ એટલે કે વ્હે પ્રોટીન સરળતાથી પચી જાય છે એવો દાવો કરવામાં આવ્યો હતો.
Nestlé India સામે ત્રણ અલગ કેસ દાખલ
આ અલગ-અલગ મામલાઓના આધારે FSSAIએ Nestlé India સામે ત્રણ અલગ-અલગ એડજ્યુડિકેશન કેસ દાખલ કર્યા છે. આ કેસોમાં પ્રોડક્ટના પ્રમોશન સાથે જોડાયેલા નિયમો અને ફોર્મ્યુલા ફૂડમાં પોષણ સંબંધિત ધોરણોનો મુદ્દો સામેલ છે.