જો તમે આગામી અઠવાડિયે બેંક સંબંધી કોઈ મહત્વપૂર્ણ કામકાજ પતાવવાનું વિચારી રહ્યા છો, તો આ સમાચાર તમારા માટે અત્યંત ઉપયોગી છે. રિઝર્વ બેંક ઓફ ઇન્ડિયા (RBI) ના રજા કેલેન્ડર મુજબ, ૧૪ થી ૨૦ સપ્ટેમ્બર, ૨૦૨૬ દરમિયાન દેશના વિવિધ પ્રંતોમાં બેંકો ચાર દિવસ માટે બંધ રહેશે. સ્થાનિક તહેવારો, ઉત્સવો અને સાપ્તાહિક રજાઓને ધ્યાનમાં રાખીને આ રજાઓ જુદા-જુદા શહેરોમાં લાગુ થાય છે.
આ અઠવાડિયે બેંક શાખાઓની રજાઓનું સમયપત્રક નીચે મુજબ છે:
૧૪ સપ્ટેમ્બર (સોમવાર): ગણેશ ચતુર્થી, હરતાલિકા અને વિનાયક વ્રત જેવા તહેવારોના કારણે બેલાપુર, બેંગલુરુ, ભુવનેશ્વર, ચેન્નાઈ, હૈદરાબાદ, મુંબઈ, નાગપુર, પણજી અને વિજયવાડામાં બેંકો બંધ રહેશે.
૧૫ સપ્ટેમ્બર (મંગળવાર): સંવત્સરી, નુઆખાઈ અને ગણેશ ચતુર્થીના બીજા દિવસ નિમિત્તે અમદાવાદ, ભુવનેશ્વર અને પણજી ખાતે બેંક શાખાઓનું કામકાજ બંધ રહેશે.
૧૮ સપ્ટેમ્બર (શુક્રવાર): એકતા વર્ષગાંઠ દિવસના અવસર પર શિલોંગમાં બેંકો બંધ રહેશે.
૨૦ સપ્ટેમ્બર (રવિવાર): સાપ્તાહિક રજા હોવાના કારણે સમગ્ર ભારતભરમાં બેંકો બંધ રહેશે.
કુલ 4 દિવસ બેંકો રહેશે બંધ
આમ, આ અઠવાડિયામાં પસંદગીના સ્થળોએ ત્રણ દિવસ અને રવિવારની રાષ્ટ્રીય રજા મળીને કુલ ચાર દિવસ બેંક શાખાઓ બંધ રહેશે. જો કે, ગ્રાહકોએ ચિંતા કરવાની જરૂર નથી કારણ કે રોકડ જમા, ચેક પ્રોસેસિંગ જેવી ભૌતિક સેવાઓ બંધ હોવા છતાં ઇન્ટરનેટ બેંકિંગ, મોબાઇલ બેંકિંગ, UPI અને ATM જેવી ડિજિટલ બેંકિંગ સેવાઓ રાબેતા મુજબ ૨૪૭ કાર્યરત રહેશે.
સપ્ટેમ્બર મહિનાના અંત ભાગમાં પણ આવશે રજાઓ
આ ઉપરાંત, સપ્ટેમ્બર મહિનાના અંત ભાગમાં પણ કેટલીક પ્રાદેશિક રજાઓ આવશે. ૨૧ સપ્ટેમ્બરે શ્રીમંત શંકરદેવ જન્મજયંતિ નિમિત્તે ગુવાહાટી, કોચી અને તિરુવનંતપુરમમાં, ૨૨ સપ્ટેમ્બરે કર્મ પૂજા નિમિત્તે રાંચીમાં, ૨૩ સપ્ટેમ્બરે મહારાજા હરિ સિંહજીના જન્મદિન નિમિત્તે જમ્મુ-શ્રીનગરમાં અને ૨૫ સપ્ટેમ્બરે ઇન્દ્રજાત્રાને કારણે ગંગટોકમાં બેંકો બંધ રહેશે.
ભારતમાં બેંક રજાઓનું સંચાલન રિઝર્વ બેંક ઓફ ઇન્ડિયા દ્વારા નેગોશિયેબલ ઇન્સ્ટ્રુમેન્ટ્સ એક્ટ અને અન્ય નિયમો હેઠળ થાય છે. નોંધનીય છે કે અગાઉ ૧૧ સપ્ટેમ્બરે યુનાઇટેડ ફોરમ ઓફ બેંક યુનિયન્સ (UFBU) દ્વારા પાંચ દિવસના કાર્ય સપ્તાહની માંગણી સાથે હડતાળ પણ બોલાવવામાં આવી હતી, જેનાથી જાહેર ક્ષેત્રની બેંકોના કામકાજ પર અસર પડી હતી. તેથી, કોઈપણ અસુવિધાથી બચવા માટે ગ્રાહકોએ બેંકની મુલાકાત લેતા પહેલા RBI ની સત્તાવાર રજાઓની યાદી અવશ્ય તપાસી લેવી જોઈએ.
આ પણ વાંચોઃ આ દેશમાં સૌથી સસ્તો મળી રહ્યો છે ‘iPhone Duo’, કિંમત સાંભળીને તમે પણ ચોંકી જશો