ભાવનગર ડિસ્ટ્રીક્ટ કો-ઓપરેટિવ બેન્કના વહીવટમાં ચાલતી ગંભીર ગેરરીતિઓ સામે આખરે મોટી કાર્યવાહી કરવામાં આવી છે. બેન્કમાં થયેલા આશરે 7.34 કરોડ રૂપિયાના મોટા સાયબર કૌભાંડ અને નાણાકીય અનિયમિતતાઓને પગલે વર્તમાન ચેરમેન અને CEOને તાત્કાલિક અસરથી તેમના હોદ્દા પરથી હટાવી દેવામાં આવ્યા છે. આ કડક કાર્યવાહીને કારણે સહકારી ક્ષેત્ર અને બેન્કિંગ વર્તુળોમાં ભારે સન્નાટો અને ખળભળાટ મચી ગયો છે.
ખોટી આવક અને નફો દર્શાવવા બદલ કારણદર્શક નોટિસ
મળતી વિગતો મુજબ, બેન્કની વાસ્તવિક નાણાકીય સ્થિતિ છુપાવીને ચોપડા પર ખોટી આવક અને બોગસ નફો દર્શાવવામાં આવ્યો હતો. આ ગંભીર બેદરકારી અને ગેરરીતિ બદલ જવાબદારોને તંત્ર દ્વારા કારણદર્શક (Show Cause) નોટિસ પણ ફટકારવામાં આવી છે. બેન્કના ગ્રાહકો અને ખાતેદારોના નાણાંની સુરક્ષા સામે સવાલો ઊભા થતાં વહીવટી તંત્ર દ્વારા સ્થિતિ પર કાબૂ મેળવવા માટે આ નિર્ણાયક પગલું ભરવામાં આવ્યું છે.
કડક પોલીસ બંદોબસ્ત વચ્ચે નવી વરણી
પરિસ્થિતિની ગંભીરતા અને સંભવિત હોબાળાને ધ્યાનમાં રાખીને બેન્ક પરિસરમાં ચુસ્ત પોલીસ બંદોબસ્ત ગોઠવી દેવામાં આવ્યો હતો. આ કડક સુરક્ષા વચ્ચે બેન્કની કામગીરી સુચારૂ રૂપે ચલાવવા માટે તાત્કાલિક અસરથી 5 માસની મુદ્દત માટે નવા ચેરમેન તરીકે કેશુભાઈ નાકરાણી અને વાઇસ ચેરમેન તરીકે અજીતસિંહ ગોહિલની નીમણૂક કરવામાં આવી છે. નવા નેતૃત્વ સામે હવે બેન્કની સાખ પુનઃ સ્થાપિત કરવાનો અને 7.34 કરોડના કૌભાંડના મૂળ સુધી પહોંચવાનો મોટો પડકાર રહેશે.