ભાવનગર શહેરમાં કાયદો અને વ્યવસ્થાની સ્થિતિ સામે ફરી એકવાર ગંભીર સવાલો ઊભા થયા છે. ભાવનગર શહેરના રૂવાપરી રોડ વિસ્તારમાં અસામાજિક તત્વો ફરી એકવાર બેફામ બન્યા છે અને ખુલ્લેઆમ કાયદાને પડકાર ફેંકી રહ્યા છે. જૂની અદાવતની દાઝ રાખીને કેટલાક કુખ્યાત શખ્સોએ એક નિર્દોષ દંપતી પર તિક્ષ્ણ હથિયાર વડે ઘાતકી હુમલો કર્યો હતો. આ હુમલામાં ગંભીર ઇજાગ્રસ્ત થયેલા પતિ-પત્નીને તાત્કાલિક સારવાર માટે સિવિલ હોસ્પિટલ ખસેડવામાં આવ્યા છે.

જૂની અદાવતે લીધું ઉગ્ર સ્વરૂપ

મૂળ માહિતી અનુસાર, ભાવનગરના રૂવાપરી રોડ પર બનેલી આ ઘટનામાં અસામાજિક તત્વોએ જૂની અદાવતનું મનદુઃખ રાખીને રમેશભાઈ જાદવ અને તેમના પત્ની સોનલબેન જાદવ પર અચાનક હુમલો કરી દીધો હતો. હુમલાખોરોએ એક પછી એક છરીના ઘા ઝીંકીને દંપતીને લોહીલુહાણ કરી નાખ્યું હતું. આ ઘટનાને પગલે આસપાસના વિસ્તારમાં ભારે ડર અને રોષનો માહોલ ફેલાઈ ગયો છે.

સોનલબેનને ગંભીર ઈજા થતાં અમદાવાદ રીફર કરાયા

આ જીવલેણ હુમલામાં ઇજાગ્રસ્ત બનેલા દંપતીને તાત્કાલિક સ્થાનિક લોકોની મદદથી ભાવનગરની સિવિલ હોસ્પિટલ ખાતે દાખલ કરવામાં આવ્યા હતા. પ્રાથમિક સારવાર દરમિયાન સોનલબેન જાદવના હાથની નસ ગંભીર રીતે કપાઈ ગઈ હોવાનું સામે આવ્યું હતું. તેમની સ્થિતિ વધુ નાજુક જણાતા તબીબો દ્વારા તેમને વધુ સારવાર માટે એમ્બ્યુલન્સ મારફતે અમદાવાદ રીફર કરવામાં આવ્યા છે.

જયદીપ અને જીગર કિટલી સહિતના સાગરિતો સામે ગુનો

આ ગંભીર હુમલાની ઘટનાને અંજામ આપનાર મુખ્ય ઈસમોમાં જયદીપ તેમજ જીગર ઉર્ફે કિટલી અને તેના અન્ય સાગરિતો સામે સામે આવ્યા છે. અસામાજિક તત્વો દ્વારા અગાઉની દુશ્મનાવટ કાઢીને જાહેરમાં આ પ્રકારે હુમલો કરવાથી પોલીસની કામગીરી સામે પણ પ્રશ્નાર્થિ ચિન્હ લાગ્યા છે. હાલ પોલીસ દ્વારા આરોપીઓને ઝડપી પાડવા માટે સઘન તપાસના ચક્રો ગતિમાન કરવામાં આવ્યા છે.

આ પણ વાંચો: Bhavnagarના ગારીયાધારમાં જૂની અદાવતમાં હત્યા, વિરડી ગામના આણંદભાઈ કંટારીયા પર 5 શખ્સોનો ખૂની હુમલો!