ભાવનગર જિલ્લામાં ગેરકાયદે પ્રવૃત્તિઓ અને બુટલેગરો સામે પોલીસ દ્વારા સકંજા વધુ કડક કરવામાં આવ્યો છે. ઘોઘા પોલીસ સ્ટેશન વિસ્તાર અંતર્ગત આવતા વાવડી ગામની સીમમાં આવેલી એક વાડીમાંથી બાતમીના આધારે પોલીસે દરોડો પાડીને વિદેશી દારૂનો જથ્થો જપ્ત કરવામાં મોટી સફળતા મેળવી છે. વહેલી સવારે હાથ ધરેલી આ કાર્યવાહીથી બુટલેગરોમાં ફફડાટ ફેલાઈ ગયો છે.

જુવારના ઢગલામાં પ્લાસ્ટિકના થેલામાં સંતાડ્યો હતો દારૂ

ઘોઘા પોલીસ પેટ્રોલિંગમાં હતી તે દરમિયાન મળેલી ચોક્કસ બાતમીના આધારે વાવડી ગામના રહેવાસી ઉપેન્દ્રભાઈ ભાનુશંકરભાઈ પંડ્યાની વાડી પર અચાનક રેડ કરવામાં આવી હતી. તપાસ દરમિયાન વાડીમાંથી ચોંકાવનારી વિગતો સામે આવી હતી જ્યાં બુટલેગરો દ્વારા દારૂ છુપાવવા માટે અનોખી ચાલ રમાઈ હતી. પોલીસે વાડીમાં તપાસ કરતા જુવારના મોટા ઢગલાની અંદર પ્લાસ્ટિકના બે થેલામાં છુપાવીને રાખવામાં આવેલો વિદેશી દારૂ મળી આવ્યો હતો.

66,000 રૂપિયાનો મુદ્દામાલ કબ્જે કરી પ્રોહિબિશનનો ગુનો નોંધ્યો

પોલીસે સ્થળ પરથી 180 એમએલની કુલ 220 ક્વાર્ટર બોટલો ભારતીય બનાવટનો પરપ્રાંતીય ઇંગ્લિશ દારૂ જપ્ત કર્યો છે, જેની કુલ કિંમત રૂ. 66,000 આંકવામાં આવી છે. વાડીના માલિક ઉપેન્દ્રભાઈ ભાનુશંકરભાઈ પંડ્યા સામે પ્રોહિબિશન એક્ટ હેઠળ ગુનો નોંધીને કાયદેસરની કાર્યવાહી હાથ ધરવામાં આવી છે. ઘોઘા પોલીસ દ્વારા આ દારૂનો જથ્થો કોનો હતો અને ક્યાંથી લાવવામાં આવ્યો હતો તે દિશામાં વધુ સઘન તપાસ શરૂ કરવામાં આવી છે.

આ પણ વાંચો: Bhavnagar: વરતેજ લઠ્ઠાકાંડમાં 1 લાખ પાનાની ચાર્જશીટ કોર્ટમાં રજૂ, 14 લોકોનાં મોત મામલે 42 આરોપીઓની ધરપકડ