ભાવનગર લઠ્ઠાકાંડ બાદ સિહોર પોલીસે ગેરકાયદે દારૂના નેટવર્ક સામે તપાસનો ધમધમાટ શરૂ કર્યો છે. તાજેતરમાં ઝડપાયેલા દારૂના જથ્થા બાદ હાથ ધરાયેલી સઘન તપાસમાં એક ચોંકાવનારો ખુલાસો થયો છે, જેમાં ડુંગર વિસ્તારમાં Royal Stag ની 54 બોટલોનો નાશ કરવામાં આવ્યો હોવાની વિગતો સામે આવી હતી. સ્થળ પર પહોંચેલી સિહોર પોલીસને નાશ કરાયેલી બોટલોના આગળના ભાગના અવશેષો હાથ લાગ્યા છે, જે તપાસમાં મહત્વપૂર્ણ પુરાવો બન્યા છે.
બારકોડ નંબર મેચ થતાં લઠ્ઠાકાંડ સાથે મળ્યો સીધો સંબંધ
આ કેસનો સૌથી મોટો વળાંક ત્યારે આવ્યો જ્યારે પોલીસે ડુંગર વિસ્તારમાંથી મળેલા અવશેષો પર રહેલા બારકોડ નંબરની ચકાસણી કરી. આ Royal Stag બોટલોના બારકોડ નંબર લઠ્ઠાકાંડના કેસમાં અગાઉ સામે આવેલા બારકોડ નંબર સાથે આબેહૂબ મેચ થતાં પોલીસ પણ ચોંકી ઉઠી છે. આ કડી મળતાની સાથે જ સિહોર પોલીસ માટે લઠ્ઠાકાંડ પાછળના મુખ્ય ગુનેગારો અને સપ્લાય ચેઇન સુધી પહોંચવાનો રસ્તો વધુ સ્પષ્ટ બન્યો છે.
સિહોર પોલીસ દ્વારા નેટવર્ક ભેદવા ઝીણવટભરી તપાસ
બારકોડની સળગતી કડી હાથ લાગતા જ સિહોર પોલીસે સમગ્ર મામલે તપાસનો દોર વધુ તેજ બનાવ્યો છે. હવે આ 54 બોટલો ક્યાંથી આવી, કોણે પહોંચાડી અને કોના મારફતે આ જથ્થો સપ્લાય થયો હતો તે અંગેની ઝીણવટભરી વિગતો મેળવવામાં આવી રહી છે. લઠ્ઠાકાંડ સાથે આ જથ્થાનું સીધું કનેક્શન છે કે કેમ તે દિશામાં પોલીસ ઊંડાણપૂર્વક પૂછપરછ કરી રહી છે, જેથી આખી સિન્ડિકેટનો પર્દાફાશ કરી શકાય.
આ પણ વાંચો : Gandhinagar : ઉંદર કાતરેલા પાંઉ મળતા હડકંપ, પટ્ટી વડાપાઉનું રજીસ્ટ્રેશન 7 દિવસ માટે સસ્પેન્ડ