ભાવનગર જિલ્લા પોલીસ તંત્રમાં વહીવટી સુગ્રથિતતા અને કાયદો-વ્યવસ્થાની પરિસ્થિતિ વધુ મજબૂત બનાવવાના હેતુસર મોટા પાયે ફેરફાર કરવામાં આવ્યા છે. ભાવનગર જિલ્લા પોલીસ વડા નિતેશ પાંડેય દ્વારા એક મહત્વપૂર્ણ આદેશ જાહેર કરીને ભાવનગર જિલ્લાના વિવિધ પોલીસ મથકો અને શાખાઓમાં ફરજ બજાવતા કર્મચારીઓની આંતરિક બદલીઓનો ઘાણવો ઉતારવામાં આવ્યો છે. આ અચાનક લેવાયેલા નિર્ણયથી સમગ્ર જિલ્લાના પોલીસ બેડામાં ભારે ખળભળાટ મચી ગયો છે.
એક જ સ્થાન પર લાંબા સમયથી જમાવડો ધરાવતા 26 કર્મચારીઓ લપેટામાં
પોલીસ સુત્રો પાસેથી મળતી માહિતી મુજબ, જે પોલીસ કર્મચારીઓ લાંબા સમયથી એક જ પોલીસ સ્ટેશન અથવા ચોક્કસ વિભાગમાં જમાવડો કરીને ફરજ બજાવતા હતા, તેમને પ્રાધાન્ય આપીને બદલીના આદેશ આપવામાં આવ્યા છે. કાયદાકીય કામગીરીમાં પારદર્શિતા લાવવા અને તંત્રને વધુ કાર્યક્ષમ બનાવવા માટે કુલ 26 જેટલા પોલીસ કર્મચારીઓને તાત્કાલિક અસરથી નવી જગ્યાઓ પર હાજર થવા સુચના આપી દેવામાં આવી છે.
LCB, SOG અને D-સ્ટાફના અનુભવી કર્મચારીઓની બદલી
આ આંતરિક બદલીની પ્રક્રિયામાં માત્ર સામાન્ય પોલીસ મથકો જ નહીં, પરંતુ જિલ્લાની મુખ્ય તપાસ એજન્સીઓ જેવી કે લોકલ ક્રાઈમ બ્રાન્ચ, સ્પેશિયલ ઓપરેશન ગ્રુપ અને વિવિધ પોલીસ મથકોમાં વર્ષોથી ડી-સ્ટાફમાં મહત્વની જવાબદારી સંભાળતા કર્મચારીઓનો પણ સમાવેશ થાય છે. આ કડક આદેશથી પોલીસ મથકોના આંતરિક સમીકરણો બદલાયા છે.
કોન્સ્ટેબલથી લઈને ASI કક્ષાના અધિકારીઓની ફેરબદલ
SP નિતેશ પાંડેય દ્વારા કરવામાં આવેલી આ બદલીઓમાં નીચલા ક્રમથી લઈને મધ્યમ કક્ષાના તમામ હોદ્દેદારો આવરી લેવાયા છે. જેમાં પોલીસ કોન્સ્ટેબલ, હેડ કોન્સ્ટેબલ અને અસિસ્ટન્ટ સબ ઈન્સ્પેક્ટરનો સમાવેશ થાય છે. લાંબા સમય બાદ આટલી મોટી સંખ્યામાં આંતરિક બદલીઓ થતાં પોલીસ કર્મચારીઓમાં વિવિધ ચર્ચાનો દોર શરૂ થયો છે, જ્યારે બીજી તરફ આ પગલાથી ગુનાખોરી પર અંકુશ મેળવવામાં નવી ઊર્જા મળશે તેવી શક્યતાઓ સેવાઈ રહી છે.
આ પણ વાંચો: Bhavnagarમાં ધોરણ-8ની વિદ્યાર્થિનીના નામે નકલી લવ લેટર વાયરલ, શાળા અને ટ્યુશન ક્લાસમાં ખળભળાટથી ભારે રોષ!