ભારત અને વેસ્ટ ઈન્ડિઝ વચ્ચે રમાયેલી 5 મેચની રોમાંચક T20 આંતરરાષ્ટ્રીય શ્રેણી 2-2ની બરાબરી પર સમાપ્ત થઈ છે. બેંગલુરુના એમ. ચિન્નાસ્વામી સ્ટેડિયમમાં રમાનારી શ્રેણીની છેલ્લી અને નિર્ણાયક મેચ વરસાદના કારણે એક પણ બોલ ફેંકાયા વિના રદ કરવી પડી હતી. આ મેચ ભલે ધોવાઈ ગઈ હોય, પરંતુ ભારતીય ટીમના દિગ્ગજ અને અનુભવી સ્વિંગ બોલર ભુવનેશ્વર કુમાર માટે તે ઐતિહાસિક સાબિત થઈ હતી. લાંબા સમય બાદ પ્લેઇંગ-11માં વાપસી કરનારા ભુવીએ મેદાન પર ઉતરતાની સાથે જ એક એવો અનોખો રેકોર્ડ પોતાના નામે કરી લીધો જે અત્યાર સુધી કોઈ ભારતીય ખેલાડી કરી શક્યો નથી.

ખલીલ અહેમદનો રેકોર્ડ તોડી ભુવનેશ્વર કુમાર બન્યા નંબર-1

સ્ટાર ફાસ્ટ બોલર ભુવનેશ્વર કુમાર લાંબા સમયથી ભારતીય ટીમમાં કમબેક કરવા માટે સખત મહેનત કરી રહ્યા હતા. વેસ્ટ ઈન્ડિઝ સામેની આખરી T20 મેચમાં આખરે તેમને પ્લેઇંગ-11માં સ્થાન મળ્યું. આ સાથે જ તેઓ બે T20 આંતરરાષ્ટ્રીય મેચ રમવા વચ્ચે સૌથી વધુ મેચ ગુમાવનારા (ચૂકી જનારા) ભારતીય ક્રિકેટર બની ગયા છે.ભુવનેશ્વરે ભારત માટે છેલ્લી T20 મેચ નવેમ્બર 2022માં રમી હતી. ત્યારબાદ છેક ઓક્ટોબર 2026માં એટલે કે આશરે 4 વર્ષ બાદ તેમની ટીમમાં વાપસી થઈ છે. આ ગાળા દરમિયાન ભારતીય ટીમે કુલ 106 T20 આંતરરાષ્ટ્રીય મેચ રમી, જે તમામમાં ભુવી ટીમની બહાર રહ્યા હતા. આ અગાઉ આ રેકોર્ડ ડાબોડી ફાસ્ટ બોલર ખલીલ અહેમદના નામે હતો, જેઓ નવેમ્બર 2019થી જુલાઈ 2024 વચ્ચે કુલ 104 આંતરરાષ્ટ્રીય મેચો ચૂક્યા હતા.

જોકે, કમનસીબે વરસાદના કારણે મેચ રદ થતાં ભુવનેશ્વર કુમારને કમબેક મેચમાં બોલિંગ કરવાનો કે પોતાની ક્ષમતા બતાવવાનો મોકો મળ્યો ન હતો.

હવે ન્યૂઝીલેન્ડ પ્રવાસ પર રહેશે સૌની નજર

વેસ્ટ ઈન્ડિઝ સામેની શ્રેણી પૂર્ણ થયા બાદ હવે ટીમ ઈન્ડિયાનો આગામી પડકાર ન્યૂઝીલેન્ડ સામેની 5 મેચની T20 શ્રેણી છે, જે 22 ઓક્ટોબરથી શરૂ થવા જઈ રહી છે. ભુવનેશ્વર કુમારને આ પ્રવાસ માટે પણ ભારતીય ટીમમાં યથાવત રાખવામાં આવ્યા છે. ન્યૂઝીલેન્ડની પીચો અને ત્યાંનું વાતાવરણ હંમેશા ફાસ્ટ બોલરોને અનુકૂળ રહે છે. પોતાની શાનદાર સ્વિંગ બોલિંગ માટે જાણીતા ભુવી કિવી દેશમાં હવામાં બોલને બંને તરફ મૂવ કરાવીને વિરોધી બેટ્સમેનોને મુશ્કેલીમાં મુકી શકે છે. કમબેક બાદ પોતાની લય સાબિત કરવા માટે ભુવનેશ્વર માટે આ શ્રેણી અત્યંત મહત્વપૂર્ણ સાબિત થશે.

આ પણ વાંચો – Shreyas Iyer Statement : તક ન મળી તો ઐયર વૈભવનું મનોબળ વધાર્યું; કીવીઓ સામે ડેબ્યૂ નક્કી?