બિહાર બોર્ડ ઓફ ઓપન સ્કૂલિંગ એન્ડ એક્ઝામિનેશન્સ (BBOSE) ના ડેપ્યુટી ડાયરેક્ટર અજય કુમાર સિંહના ઠેકાણાઓ પર EOU ની ટીમે સપાટો બોલાવ્યો છે. પટના અને બેગુસરાય સહિતના ત્રણ અલગ-અલગ સ્થળો પર ચાલી રહેલા આ દરોડા દરમિયાન કરોડો રૂપિયાની EOU દ્વારા અપ્રમાણસર સંપત્તિનો પર્દાફાશ થયો છે, જેણે શિક્ષણ જગતમાં ભારે ચકચાર મચાવી દીધી છે.

3.43 કરોડની બેનામી સંપત્તિ મળી

વિશ્વસનીય સૂત્રો દ્વારા મળેલી ગુપ્ત માહિતી અને તેની ઊંડી ચકાસણી બાદ, EOU ની ટીમે વિશેષ કોર્ટ પાસેથી સર્ચ વોરંટ મેળવ્યું હતું. ત્યારબાદ નાયબ પોલીસ અધિક્ષક (DSP) કક્ષાના અધિકારીઓ હેઠળ આ ઓપરેશન હાથ ધરવામાં આવ્યું હતું. પ્રાથમિક તપાસ અને દસ્તાવેજોની ચકાસણીમાં સામે આવ્યું છે કે ડેપ્યુટી ડિરેક્ટર અજય કુમાર સિંહે તેમની કાયદેસરની અને જાણીતી આવક કરતા અનેક ગણી વધુ સંપત્તિ વસૂલી છે. સત્તાવાર આંકડા મુજબ, તેમની અપ્રમાણસર સંપત્તિ અંદાજે ₹3,43,78,300 જેટલી છે, જે તેમની કુલ જાણીતી આવક કરતાં આશરે 90.04 ટકા વધુ છે.

કુલ ત્રણ મુખ્ય ઠેકાણાઓ પર પાડી રેડ

પટનાના રાજીવ નગર પોલીસ સ્ટેશન વિસ્તાર અંતર્ગત આકાશવાણી રોડ, ખાજપુરા સ્થિત ચંદ્રતારા ભવન (બી.બી. કોલેજ).

પટનાના મીઠાપુર ખાતે આવેલી બિહાર ઓપન સ્કૂલિંગ એન્ડ એક્ઝામિનેશન્સ બોર્ડની ઓફિસનો મુખ્ય રૂમ.

બેગુસરાય જિલ્લાના સાહેબપુર કમલ પોલીસ સ્ટેશન વિસ્તારના સહાના પોસ્ટ ઓફિસ હેઠળ આવતું પરોરા ગામ સ્થિત તેમનું પૈતૃક નિવાસસ્થાન.

અધિકારીનું ભવ્ય અને વૈભવી ઘર જોવા મળ્યું

દરોડા દરમિયાન સામે આવેલા એક વીડિયોમાં અધિકારીનું ભવ્ય અને વૈભવી ઘર જોવા મળ્યું છે, જ્યાં ઘરની બહાર અનેક ટુ-વ્હીલર વાહનો પાર્ક થયેલા નજરે ચડ્યા છે. EOU ના અધિકારીઓના જણાવ્યા અનુસાર, સર્ચ ઓપરેશન અને દરોડાની સમગ્ર પ્રક્રિયા પૂર્ણ થયા બાદ જપ્ત કરાયેલી મિલકતો, બેંક ખાતાઓ, કિંમતી દસ્તાવેજો અને અન્ય રોકડ કે ચીજવસ્તુઓની સત્તાવાર અને વિગતવાર માહિતી જાહેર કરવામાં આવશે. આ મામલે અજય કુમાર સિંહ વિરુદ્ધ ભ્રષ્ટાચાર નિવારક કાયદા હેઠળ કેસ નોંધીને આગળની કાયદેસરની સઘન તપાસ શરૂ કરી દેવામાં આવી છે.

આ પણ વાંચોઃ Pakistan એ ભારતીય ફ્લાઇટ માટેનો પ્રતિબંધ લંબાવ્યો, ઇન્ટરનેશનલ ફ્લાઇટ મોંઘી થશે?