Budget 2027ની તૈયારી શરૂ થઈ ગઈ છે. નાણાં મંત્રાલયે તમામ કેન્દ્રીય મંત્રાલયો અને વિભાગોને આગામી નાણાકીય વર્ષ માટે ખર્ચ અને આવકનો વાસ્તવિક અંદાજ તૈયાર કરવા કહ્યું છે. સરકારનું ફોકસ સરકારી ખર્ચને નિયંત્રિત કરવા, યોજનાઓની સમીક્ષા કરવા અને બિન-કર આવક વધારવા પર રહેશે. નાણાં મંત્રાલય તરફથી જાહેર કરવામાં આવેલા બજેટ સર્ક્યુલર મુજબ, 12 ઓક્ટોબર 2026થી પ્રી-બજેટ બેઠકો શરૂ થશે..

 12 ઓક્ટોબર 2026થી પ્રી-બજેટ બેઠકો શરૂ થશે

આ બેઠકો નવેમ્બરના મધ્ય સુધી ચાલશે. આ બેઠકોની અધ્યક્ષતા ખર્ચ સચિવ કરશે. મંત્રાલયોએ બજેટ સાથે જોડાયેલી જરૂરી માહિતી 6 ઓક્ટોબર સુધી જમા કરાવવાની રહેશે, જ્યારે ટેક્સથી થતી આવકનો અંદાજ 15 ઓક્ટોબર સુધી આપવાનો રહેશે. મંત્રાલયોએ પહેલા તે ખર્ચ માટે જોગવાઈ કરવાની રહેશે, જે પહેલાથી ચાલી રહ્યા છે અથવા જેને પૂર્ણ કરવા જરૂરી છે. ત્યારબાદ જ નવી યોજનાઓ અથવા નવા ખર્ચ માટે નાણાંની માંગ કરી શકાશે. ખર્ચનો અંદાજ લગાવતી વખતે સપ્ટેમ્બર 2026 સુધીનો વાસ્તવિક ખર્ચ, ગયા વર્ષે આ જ સમયગાળા દરમિયાન થયેલો ખર્ચ, બાકી ચૂકવણી અને બચેલી રકમને ધ્યાનમાં લેવાની રહેશે.

જૂની યોજનાઓની થશે સમીક્ષા

સરકારે બંધ થઈ ચૂકેલી યોજનાઓને સુધારેલા અંદાજમાં સામેલ નહીં કરવાની સૂચના આપી છે. જ્યારે જે યોજનાઓ 2026-27 પછી ચાલુ નહીં રહે, તેમના માટે Budget 2027-28માં કોઈ રકમ ફાળવવામાં આવશે નહીં. સરકાર મંત્રાલયોને એવી પણ સૂચના આપી રહી છે કે નાણાકીય વર્ષના અંતે મોટી રકમ ખર્ચ્યા વિના પરત ન કરવી પડે. જો કોઈ ગ્રાન્ટમાં 100 કરોડ રૂપિયા કે તેનાથી વધુની બચત થાય છે, તો તેનું કારણ જણાવવું પડશે.

બિન-કર આવક વધારવા પર ભાર

સરકારે મંત્રાલયો પાસેથી યુઝર ચાર્જ, બાકી રકમ અને અન્ય બિન-કર આવકની માહિતી માંગી છે. સેવાઓ માટે લેવામાં આવતા ચાર્જની પણ સમીક્ષા થઈ શકે છે, જેથી સરકારને પોતાની કિંમત સાથે યોગ્ય વળતર મળી શકે. જોકે, હજુ એ સ્પષ્ટ નથી કે Budget 2027માં ટેક્સમાં શું ફેરફાર થશે, સબસિડી કેટલી ઘટશે અથવા કઈ યોજનાને કેટલી રકમ મળશે. બજેટ પ્રક્રિયા આગળ વધશે તેમ આ નિર્ણયો અંગેની તસવીર સ્પષ્ટ થશે.

વધુ સમાચાર વાંચવા ડાઉનલોડ કરો સંદેશ ન્યૂઝ એપ