છોટાઉદેપુર જિલ્લાના નસવાડી તાલુકામાં બોગસ અને નકલી સરકારી દસ્તાવેજો બનાવતા તત્વો સામે વહીવટી તંત્ર દ્વારા લાલ આંખ કરવામાં આવી છે. નસવાડી મામલતદાર દ્વારા સરકારી રેકોર્ડ અને જાતિના દાખલામાં ગેરરીતિ આચરીને નકલી જાતિના પ્રણામપત્રો મેળવવા અંગે નસવાડી પોલીસ સ્ટેશનમાં વિધિવત રીતે લેખિત ફરિયાદ નોંધાવવામાં આવી છે. આ ગંભીર મામલે પોલીસે ત્વરિત કાર્યવાહી કરીને બે શખ્સો સામે કાયદેસરનો ગુનો દાખલ કર્યો છે.
નકલી પ્રણામપત્રો બનાવવાનો ભાંડો ફૂટ્યો
પછાત વર્ગ કે અનામત જાતિના લાભો મેળવવા માટે બોગસ આધાર-પુરાવા ઊભા કરીને નકલી જાતિના દાખલા બનાવવામાં આવ્યા હોવાનું તંત્રના ધ્યાન પર આવ્યું હતું. તપાસ દરમિયાન ચોંકાવનારી વિગતો સામે આવતાં મામલતદાર કચેરી દ્વારા આ સમગ્ર કૌભાંડ અંગે ઊંડાણપૂર્વક તપાસ હાથ ધરવામાં આવી હતી. ગેરકાયદેસર રીતે સરકારી દસ્તાવેજો બનાવી તેનો સાચા તરીકે ઉપયોગ કરવાનો ભાંડો ફૂટતાં આખરે મામલતદારે કાયદાનો કોરડો વીંઝ્યો છે.
પોલીસે ગુનો નોંધી તપાસ તેજ કરી
નસવાડી મામલતદારની ફરિયાદના આધારે પોલીસે બે આરોપીઓ સામે બોગસ દસ્તાવેજો બનાવવા, બનાવટી સહી-સિક્કાનો ઉપયોગ કરવા તેમજ ગેરરીતિ આચરવા બદલ ગુનો નોંધી આગળની તપાસ હાથ ધરી છે. આ નકલી જાતિના દાખલા કૌભાંડમાં અન્ય કોઈ સરકારી કર્મચારી કે વચેટિયાઓની સંડોવણી છે કે કેમ તે અંગે પણ પોલીસ દ્વારા સઘન પૂછપરછ કરવામાં આવી રહી છે. મામલતદારની આ આકરી કાર્યવાહીથી નકલી કાગળોના આધારે લાભ ખાટતા ભૂમાફિયાઓ અને વચેટિયાઓમાં ભારે ફફડાટ વ્યાપી ગયો છે.