કેરળની રાજધાની તિરુવનંતપુરમના શ્રીકાર્યમ વિસ્તારમાં 17 વર્ષના કિશોરની હત્યાનો ચોંકાવનારો મામલો સામે આવ્યો છે. આરોપ છે કે 17 વર્ષના અન્ય કિશોરે ઇન્સ્ટાગ્રામ પર યુવતી બનીને મૃતક અભિરામ સાથે વાતચીત કરી અને તેને મળવા બોલાવ્યો હતો. ત્યારબાદ તેની હત્યા કરવામાં આવી હતી. આ મામલે પોલીસે 2 લોકોની ધરપકડ કરી છે, જ્યારે એક યુવતીને કસ્ટડીમાં લઈને પૂછપરછ કરવામાં આવી રહી છે.

રવિવાર સાંજથી ગુમ હતો અભિરામ

મૃતક અભિરામ રવિવાર સાંજથી ગુમ હતો. પરિવારનો આરોપ છે કે અભિરામ ગુમ થયો હોવાની જાણ પોલીસને કરવા છતાં શરૂઆતમાં જરૂરી કાર્યવાહી કરવામાં આવી નહોતી. બાદમાં તેની હત્યાનો મામલો સામે આવ્યો હતો. પોલીસ તપાસમાં હત્યા પાછળ પ્રેમસંબંધને લઈને થયેલો વિવાદ હોવાનું પ્રાથમિક રીતે સામે આવ્યું છે.

ઇન્સ્ટાગ્રામ પર યુવતી બનીને વાતચીત

પોલીસના જણાવ્યા અનુસાર, મુખ્ય આરોપી 17 વર્ષનો છે. આરોપીની પૂર્વ ગર્લફ્રેન્ડનો નવો બોયફ્રેન્ડ અભિરામનો મિત્ર હતો. આરોપી આ મિત્રને મળવા માંગતો હતો. આ માટે તેણે પોતાની હાલની ગર્લફ્રેન્ડના ઇન્સ્ટાગ્રામ એકાઉન્ટનો ઉપયોગ કરીને અભિરામ સાથે યુવતી બનીને વાતચીત શરૂ કરી હતી. આરોપીએ અભિરામને મળવા બોલાવ્યો હતો. અભિરામને લાગ્યું હતું કે તે યુવતીને મળવા જઈ રહ્યો છે, પરંતુ સ્થળ પર પહોંચતાં તેને આરોપી મળ્યો હતો.

મિત્રને બોલાવવા દબાણ કર્યું

આરોપીએ અભિરામ પર તેના મિત્રને ફોન કરીને ત્યાં બોલાવવા દબાણ કર્યું હતું. જોકે, અભિરામનો મિત્ર ત્યાં પહોંચ્યો નહોતો. ત્યારબાદ અભિરામે સ્થળ પરથી જવાનો પ્રયાસ કર્યો હતો. પોલીસના જણાવ્યા મુજબ, આરોપીના નિવેદનમાં સામે આવ્યું છે કે અભિરામ જવા લાગ્યો ત્યારે તેના પર હુમલો કરવામાં આવ્યો હતો. આરોપીએ પથ્થરથી અભિરામના માથા પર હુમલો કર્યો હતો અને ત્યારબાદ ગળું દબાવી તેની હત્યા કરી હતી.

બોરીમાં મૃતદેહ ભરી નાળાની પાસે ફેંક્યો

હત્યા બાદ આરોપીએ મૃતદેહનો નિકાલ કરવા માટે 22 વર્ષના ઉમરને ફોન કરીને મદદ માંગી હતી. ત્યારબાદ બંનેએ અભિરામના મૃતદેહને બોરીમાં મૂક્યો હતો અને ઓછી અવરજવર ધરાવતા વિસ્તારમાં લઈ જઈ નાળાની નજીક ફેંકવાનો પ્રયાસ કર્યો હતો. બાદમાં એ જ વિસ્તારમાંથી અભિરામનો મૃતદેહ મળી આવ્યો હતો.

2 લોકોની ધરપકડ, યુવતીની પૂછપરછ

પોલીસે આ કેસમાં મુખ્ય આરોપી સહિત 2 લોકોની ધરપકડ કરી છે. એક યુવતીને પણ કસ્ટડીમાં લઈને પૂછપરછ કરવામાં આવી રહી છે. પોલીસ સમગ્ર ઘટનાક્રમની તપાસ કરી રહી છે. હાલ સામે આવેલી માહિતી મુજબ, હત્યાનું કારણ આરોપીની પૂર્વ ગર્લફ્રેન્ડ અને તેના નવા બોયફ્રેન્ડ સાથે જોડાયેલો વિવાદ હોવાનું જણાવવામાં આવી રહ્યું છે. 

આ પણ વાંચો :   Shivpuri: શ્રીકૃષ્ણના સ્વરૂપ પર ટિપ્પણી બદલ ધીરેન્દ્ર શાસ્ત્રીને કાનૂની નોટિસ, 15 દિવસમાં માફીની માંગ