અમેરિકાના ટેનેસીમાં મૃત્યુદંડની સજા પામેલી ક્રિસ્ટા પાઈકને ઘાતક ઈન્જેક્શન આપવાની પ્રક્રિયા નિષ્ફળ જતા સમગ્ર મામલો ચર્ચામાં આવ્યો છે. 30 સપ્ટેમ્બર 2026ના રોજ પાઈકને પેન્ટોબાર્બિટલની 2 ડોઝ આપવામાં આવી હતી, પરંતુ બંને ડોઝ બાદ પણ તેનું મૃત્યુ થયું નહોતું. લગભગ 90 મિનિટથી વધુ સમય સુધી ડેથ ચેમ્બરમાં તે જીવતી રહી હતી.
નસ શોધવામાં જ લગભગ 1 કલાક લાગ્યો
પાઈકને ઈન્જેક્શન આપવાની પ્રક્રિયા શરૂ થયા બાદ મેડિકલ ટીમને તેની નસ શોધવામાં મુશ્કેલી પડી હતી. તેના વકીલના જણાવ્યા મુજબ અધિકારીઓએ લગભગ 1 કલાક સુધી નસ શોધવાનો પ્રયાસ કર્યો હતો અને તેના ડાબા હાથમાં ઓછામાં ઓછા 7 વખત સોય લગાવવામાં આવી હતી.
પાઈક પોતે જ અધિકારીઓને બતાવતી રહી નસ
નસ શોધવામાં મુશ્કેલી પડી રહી હતી ત્યારે પાઈકે અધિકારીઓને પોતાના ખભા પાસે નસ મળી શકે તેમ જણાવ્યું હતું. વકીલના જણાવ્યા મુજબ તે વારંવાર અધિકારીઓને ત્યાં પ્રયાસ કરવા કહી રહી હતી. આ દરમિયાન તેણે હાથમાં થતી અસામાન્ય લાગણી અંગે પણ સવાલ કર્યો હતો.
પહેલા ડોઝ બાદ પણ દવાની અસર ન થઈ
નસમાં ઘાતક દવા પેન્ટોબાર્બિટલની પહેલી ડોઝ આપવામાં આવી હતી. સામાન્ય રીતે આ દવા નર્વસ સિસ્ટમની પ્રવૃત્તિ ધીમી કરે છે. પરંતુ પાઈક પર પહેલી ડોઝની અપેક્ષિત અસર જોવા મળી નહોતી. ત્યારબાદ બેકઅપ ડોઝ પણ આપવામાં આવી, છતાં તેનું મૃત્યુ થયું નહોતું.
90 મિનિટ સુધી ડેથ ચેમ્બરમાં જીવતી રહી
વકીલોના જણાવ્યા મુજબ 1 કલાકથી વધુ સમય પસાર થયા બાદ પણ પાઈક શ્વાસ લઈ રહી હતી. ડેથ ચેમ્બરમાં તેના બોલવાનો, ગાવાનો અને બાદમાં જોરથી શ્વાસ લેવાનો અવાજ સંભળાતો હતો. આખરે ડેથ ચેમ્બરનો માઇક્રોફોન બંધ કરવામાં આવ્યો અને મૃત્યુદંડની પ્રક્રિયા અટકાવી દેવામાં આવી.
ગંભીર હાલતમાં હોસ્પિટલ ખસેડાઈ
મૃત્યુદંડની પ્રક્રિયા રોકાયા બાદ પાઈકને હોસ્પિટલમાં ખસેડવામાં આવી હતી. તેના વકીલોએ જણાવ્યું કે તેની સ્થિતિ ગંભીર છે અને તેને જીવનરક્ષક સારવાર આપવામાં આવી રહી છે. જોકે વહીવટીતંત્ર તરફથી હજુ સુધી ઘાતક ઈન્જેક્શન અસરકારક કેમ ન રહ્યું તેની સ્પષ્ટ માહિતી આપવામાં આવી નથી.
વકીલોએ પ્રક્રિયા સામે ઉઠાવ્યા ગંભીર સવાલ
પાઈકના વકીલોએ સમગ્ર પ્રક્રિયાને અત્યંત પીડાદાયક ગણાવી છે. તેમના જણાવ્યા મુજબ ડેથ ચેમ્બરમાં લાંબા સમય સુધી પાઈકની સ્થિતિ જોવી પડી હતી. વકીલોએ એવી આશંકા પણ વ્યક્ત કરી છે કે લાંબા સમય સુધી શરીરમાં ઓક્સિજનની અછત રહી હોય તો મગજને નુકસાન થયું હોઈ શકે છે.
1995ના હત્યા કેસમાં મળી હતી સજા
ક્રિસ્ટા પાઈકને 1995માં થયેલી કોલીન સ્લેમરની હત્યાના કેસમાં મૃત્યુદંડની સજા ફટકારવામાં આવી હતી. તે સમયે પાઈક 18 વર્ષની હતી. સરકારી વકીલો મુજબ પાઈકને શંકા હતી કે સ્લેમર તેના બોયફ્રેન્ડની નજીક આવી રહી હતી.
હત્યામાં હિંસક હુમલાનો આરોપ
અભિયોજન પક્ષના જણાવ્યા મુજબ પાઈકે પોતાના બોયફ્રેન્ડ સાથે મળીને સ્લેમરને એકાંત સ્થળે બોલાવી હતી. ત્યારબાદ તેની સાથે મારપીટ કરવામાં આવી હતી અને બોક્સ કટર તથા ડામરના ટુકડાથી હુમલો કરવામાં આવ્યો હતો. મૃતદેહ પર પેન્ટાગ્રામ જેવું નિશાન મળતા તે સમયે આ કેસને ‘સેટાનિક પેનિક’ સાથે પણ જોડવામાં આવ્યો હતો.
30 સપ્ટેમ્બર 2026ના રોજ નક્કી હતી સજા
પાઈકની અપીલ પ્રક્રિયા પૂર્ણ થયા બાદ ટેનેસી સરકાર દ્વારા મૃત્યુદંડની તારીખ નક્કી કરવા માટે સુપ્રીમ કોર્ટમાં અરજી કરવામાં આવી હતી. 30 સપ્ટેમ્બર 2025ના આદેશ બાદ 30 સપ્ટેમ્બર 2026ના રોજ મૃત્યુદંડની સજા અમલમાં મૂકવાની તારીખ નક્કી થઈ હતી.
કોર્ટમાં પણ થયો અંતિમ ક્ષણનો ફેરફાર
મૃત્યુદંડની પ્રક્રિયા શરૂ થવાના થોડા સમય પહેલાં એક અપીલ કોર્ટે સજા પર રોક લગાવી હતી. જોકે થોડા કલાકો બાદ અમેરિકાની સુપ્રીમ કોર્ટે આ રોક હટાવી દીધી હતી. ત્યારબાદ ટેનેસીની જેલમાં ઘાતક ઈન્જેક્શન આપવાની પ્રક્રિયા આગળ વધારવામાં આવી હતી.
હવે મૃત્યુદંડ ઘટાડવાની માંગ
મૃત્યુદંડની પ્રક્રિયા નિષ્ફળ ગયા બાદ પાઈકના વકીલો હવે તેની સજા ઘટાડવાની માંગ કરી રહ્યા છે. તેમનું કહેવું છે કે એક જ વ્યક્તિને ફરીથી આવી પ્રક્રિયામાંથી પસાર કરવી ક્રૂર અને પીડાદાયક બની શકે છે. બીજી તરફ સત્તાવાળાઓએ હજી સુધી પાઈકને ફરીથી મૃત્યુદંડ આપવાની પ્રક્રિયા અંગે કોઈ સ્પષ્ટ નિર્ણય જાહેર કર્યો નથી.
આ પણ વાંચો : Smit Machchharએ ઇન્ટરનેટની દુનિયામાં ભૂચાલ સર્જ્યો, વાંચો.. Google પર સૌથી વધુ શું સર્ચ થયું?