તમિલનાડુના થેની જિલ્લામાં રસ્તા પર ફટાકડા ફોડતા યુવકોને રોકવા જતાં પોલીસ સ્પેશિયલ સબ-ઇન્સ્પેક્ટર સેન્થિલ કુમારનું મોત થયું છે. ફરજ પૂરી કરીને ઘરે પરત ફરી રહેલા સેન્થિલ કુમારે રસ્તા પર ફટાકડા ફોડી રહેલા યુવકોને રોક્યા હતા. આ દરમિયાન યુવકો સાથે ધક્કામુક્કી થઈ હતી અને તેઓ જમીન પર પટકાયા હતા. ઘટનામાં સામેલ હોવાના આરોપસર પોલીસે 3 સ્થાનિક યુવકોની ધરપકડ કરી છે.

રસ્તા પર ફટાકડા ફોડતા યુવકોને રોક્યા

મળતી માહિતી મુજબ, સેન્થિલ કુમાર ડ્યૂટી પૂરી કરીને ઘરે જઈ રહ્યા હતા. રસ્તામાં તેમણે કેટલાક યુવકોને જાહેર માર્ગ પર ફટાકડા ફોડતા જોયા હતા. ફટાકડાના કારણે રસ્તા પરથી પસાર થતા લોકોને મુશ્કેલી અને જોખમ ઊભું થતું હોવાથી તેમણે યુવકોને રસ્તાથી દૂર જઈને ફટાકડા ફોડવાની સલાહ આપી હતી.

ફોનથી તેમની હરકતોનું રેકોર્ડિંગ

યુવકોએ તેમની વાત ન માનતાં સેન્થિલ કુમારે મોબાઇલ ફોનથી તેમની હરકતોનું રેકોર્ડિંગ શરૂ કર્યું હતું.

ધક્કામુક્કી દરમિયાન જમીન પર પટકાયા

પોલીસના જણાવ્યા અનુસાર, સેન્થિલ કુમારે એક યુવકને પકડવાનો પ્રયાસ કર્યો ત્યારે એક યુવકે તેમને જોરથી કોણી મારી હતી. તેના કારણે તેઓ સંતુલન ગુમાવીને જમીન પર પટકાયા હતા.

હોસ્પિટલમાં સારવાર દરમિયાન મોત

ઘટનાની જાણ થતાં નજીકમાંથી પસાર થઈ રહેલી પેટ્રોલિંગ પોલીસ ટીમ તાત્કાલિક સ્થળ પર પહોંચી હતી. બેભાન અવસ્થામાં પડેલા સેન્થિલ કુમારને સારવાર માટે નજીકની હોસ્પિટલમાં લઈ જવામાં આવ્યા હતા. જોકે, તબીબોના પ્રયાસો છતાં તેમનો જીવ બચાવી શકાયો નહોતો.

3 યુવકોની ધરપકડ

ઘટનાની જાણ થતાં થેની જિલ્લાના પોલીસ અધિક્ષકે સ્થળની મુલાકાત લઈને તપાસના આદેશ આપ્યા હતા. પોલીસે કાર્યવાહી કરીને આ ઘટનામાં સામેલ હોવાના આરોપસર 3 સ્થાનિક યુવકોની ધરપકડ કરી છે.

અગાઉથી હૃદયની બીમારી હતી

પોલીસે જણાવ્યું હતું કે સેન્થિલ કુમારને અગાઉથી હૃદયની બીમારી હતી અને જમીન પર પટકાયા બાદ તેમની સ્થિતિ વધુ ગંભીર બની હતી. હાલ પોલીસ સમગ્ર ઘટનાની વધુ તપાસ કરી રહી છે.  

આ પણ વાંચો :    Accident : ગળામાં ફસાયો ફુગ્ગો, 13 વર્ષની બાળકીનું મોત; દિવાળીની ખુશીઓ પળવારમાં માતમમાં ફેરવાઈ