સુરેન્દ્રનગર નજીક આવેલા શિવાલય શેલ્ટર હોમમાં CUSMCના વિદ્યાર્થીઓએ આરોગ્ય તપાસ અને સ્નેહમિલન કાર્યક્રમ યોજ્યો. શ્રીમદ્ રાજચંદ્ર લવ એન્ડ કેર દ્વારા સંચાલિત સી. યુ. શાહ મેડિકલ કોલેજના વિદ્યાર્થીઓએ આ કાર્યક્રમનું આયોજન કર્યું હતું. શ્રીમદ્ રાજચંદ્ર સર્વમંગલ હોસ્પિટલ (SRSH)ની તબીબી ટીમના માર્ગદર્શન હેઠળ વિદ્યાર્થીઓએ આશરે 130થી વધુ રહેવાસીઓની સામાન્ય આરોગ્ય તપાસ કરી. તપાસમાં મોટાભાગના રહેવાસીઓને ત્વચાની ગંભીર સમસ્યાઓ, માનસિક બીમારીઓ અને શારીરિક વિકલાંગતા હોવાનું જાણવા મળ્યું. વિદ્યાર્થીઓએ તેમની આરોગ્ય સમસ્યાઓ જાણી તબીબી માર્ગદર્શન આપ્યું અને જરૂરી તપાસ કરી. વિદ્યાર્થીઓએ શેલ્ટર હોમનાં બાળકોને સ્ટેશનરી કિટ અને નવાં વસ્ત્રો આપ્યાં. રહેવાસીઓને રોજિંદા ઉપયોગ માટે સ્ટીલની પાણીની બોટલો અને અંગત વસ્તુઓ રાખવા સ્ટીલના ડબ્બા આપ્યા. પૌષ્ટિક આહાર તરીકે કેળાં અને સફરજન પણ વહેંચ્યાં. કાર્યક્રમના અંતે મેડિકલ વિદ્યાર્થીઓએ શેલ્ટર હોમના રહેવાસીઓ અને સ્ટાફ સાથે વાતચીત કરી. તેમણે રહેવાસીઓના જીવન વિશે જાણ્યું અને તેમની સાથે બેસીને સમૂહ ભોજન લીધું. આ કાર્યક્રમમાં આરોગ્ય તપાસની સાથે રહેવાસીઓને જરૂરી વસ્તુઓ પણ આપવામાં આવી. CUSMCના વિદ્યાર્થીઓએ આ પ્રવૃત્તિ દ્વારા સમાજ પ્રત્યેની જવાબદારી નિભાવી.