Delhiના પૂર્વ મુખ્ય સચિવ રાકેશ મેહતા હવે રહ્યા નથી. 1975 બેચના વરિષ્ઠ IAS અધિકારી રાકેશ મેહતાએ રવિવારે નોઈડાના સેક્ટર-82 સ્થિત સેન્ટ્રલ વિહાર-2 સોસાયટીમાં કથિત રીતે ફાંસો લગાવી આત્મહત્યા કરી હોવાનું સામે આવ્યું છે. તેમનો મૃતદેહ બપોરે મળી આવ્યો હતો. 2007થી 2010 સુધી દિલ્હીના મુખ્ય સચિવ રહેલા મેહતાએ કોમનવેલ્થ ગેમ્સ દરમિયાન દિલ્હી વહીવટમાં મહત્વની જવાબદારી નિભાવી હતી.

30 વર્ષથી વધુ સમય સુધી સરકારી સેવા આપી

1975 બેચના IAS અધિકારી રાકેશ મેહતાએ ત્રણ દાયકાથી વધુ લાંબી કારકિર્દી દરમિયાન દિલ્હી સરકાર અને દિલ્હી મ્યુનિસિપલ કોર્પોરેશનમાં અનેક મહત્વપૂર્ણ હોદ્દા પર કામ કર્યું હતું. તેમણે 2007માં દિલ્હીના મુખ્ય સચિવ તરીકે જવાબદારી સંભાળી હતી અને નવેમ્બર 2010માં નિવૃત્ત થયા હતા. સોમવારે લોધી સ્મશાન ઘાટ પર તેમના અંતિમ સંસ્કાર કરવામાં આવ્યા હતા.

અનેક વહીવટી સુધારાઓમાં મહત્વની ભૂમિકા

રાકેશ મેહતા સાથે કામ કરનારા સાથીદારો અને નેતાઓએ તેમને એક કુશળ પ્રશાસક તરીકે યાદ કર્યા હતા. તેઓ નવા વિચારો અપનાવવા અને સુધારાઓ લાગુ કરવા માટે હંમેશા તૈયાર રહેતા હતા. તેમણે પ્રોપર્ટી ટેક્સના આકલન અને વીજળીના ખાનગીકરણથી લઈને બ્લૂલાઇન બસોને હટાવવા અને લો-ફ્લોર બસો લાવવાની યોજના જેવા અનેક મહત્વપૂર્ણ સુધારાઓને આગળ વધાર્યા હતા.

વીજળીના ખાનગીકરણમાં પણ મોટી જવાબદારી સંભાળી

દિલ્હીના પૂર્વ મંત્રી અરવિંદર સિંહ લવલીના જણાવ્યા મુજબ, રાકેશ મેહતા હંમેશા નવી નીતિઓ અને વિચારોને લાગુ કરવા માટે તૈયાર રહેતા હતા. વીજળીના ખાનગીકરણના સમયગાળા દરમિયાન તેઓ દિલ્હી સરકારમાં વીજળી સચિવની જવાબદારી સંભાળી રહ્યા હતા.

બ્લૂલાઇન બસો હટાવવામાં મહત્વની ભૂમિકા

દિલ્હીના રસ્તાઓ પરથી બ્લૂલાઇન બસોને હટાવીને તેમની જગ્યાએ લો-ફ્લોર બસો ચલાવવાની યોજના તૈયાર કરવામાં પણ રાકેશ મેહતાની મહત્વપૂર્ણ ભૂમિકા રહી હતી. દિલ્હીના પૂર્વ મુખ્ય સચિવ રમેશ નેગીએ પણ અનેક મહત્વપૂર્ણ વહીવટી સુધારાઓનો શ્રેય રાકેશ મેહતાને આપ્યો હતો.

આ પણ વાંચો:  IAS આર. પી. પટેલ બનાવાયા જોઈન્ટ ચીફ ઈલેક્ટોરલ ઓફિસર; ચૂંટણી પંચમાં નવી નિયુક્તિ