Delhiના જંતર-મંતર ખાતે CJPના વિરોધ પ્રદર્શન દરમિયાન એક નાબાલિક વિદ્યાર્થીનીના પિતા પર હુમલો કરવાના આરોપી સોશિયલ મીડિયા ઈન્ફ્લુએન્સર સ્વતંત્ર ભારદ્વાજને દિલ્હી પોલીસની ક્રાઈમ બ્રાન્ચે ઉત્તર પ્રદેશના બુલંદશહરમાંથી કસ્ટડીમાં લીધો છે. ધરપકડથી બચવા માટે તે બુલંદશહરના એક ગામમાં છુપાયો હતો. આ મામલાની સંવેદનશીલતાને ધ્યાનમાં રાખીને પોલીસે સ્વતંત્ર ભારદ્વાજ વિરુદ્ધ POCSO એક્ટ હેઠળ નવી FIR નોંધાવી છે. આ ઉપરાંત જૂની FIRમાં SC/ST એક્ટની સંબંધિત કલમો પણ ઉમેરવામાં આવી છે.

હુમલા બાદ આપ્યું હતું ભડકાઉ નિવેદન

જુલાઈમાં CJPના વિરોધ પ્રદર્શન દરમિયાન થયેલી હિંસા બાદ સ્વતંત્ર ભારદ્વાજે સોશિયલ મીડિયા પર જાહેરમાં દાવો કર્યો હતો કે તેણે નાબાલિક વિદ્યાર્થીનીના પિતાના માથામાં ઈજા કરી છે. તેણે પોતાના રાજકીય સંપર્કોનો ઉલ્લેખ કરીને જેલમાં જવાથી બચી જવાની વાત પણ કરી હતી. આ નિવેદન બાદ CJPના સહ-સંયોજક સૌરવ દાસ અને આશુતોષ રંકા સમર્થકો તથા નેતાઓ સાથે દિલ્હી પાર્લામેન્ટ સ્ટ્રીટ પોલીસ સ્ટેશન પહોંચ્યા હતા અને આરોપી સામે કડક કાર્યવાહી કરવાની માંગ કરી હતી. પોલીસે તેમને 72 કલાકમાં આરોપીની ધરપકડ કરવાની ખાતરી આપી હતી.

કેબ ડ્રાઈવરના ઘરે છુપાયો હતો

પોલીસથી બચવા માટે સ્વતંત્ર ભારદ્વાજ શુક્રવારે વહેલી સવારે બુલંદશહરના નૈથલા ગામમાં પહોંચ્યો હતો. અહીં તેણે હરિશંકર શર્મા નામના વ્યક્તિના ઘરે આશ્રય લીધો હતો. હરિશંકર દિલ્હી-NCRમાં કેબ ચલાવે છે. હરિશંકર શર્માએ જણાવ્યું કે સ્વતંત્ર અગાઉ એક મુસાફરી દરમિયાન તેને મળ્યો હતો. બાદમાં તેણે ફોન કરીને મળવા આવવાની વાત કરી હતી અને સવારે અન્ય એક વ્યક્તિ સાથે તેના ઘરે પહોંચ્યો હતો. શરૂઆતમાં હરિશંકરને કોઈ શંકા થઈ નહોતી. પરંતુ જ્યારે ગામમાં મીડિયાકર્મીઓ પહોંચવા લાગ્યા ત્યારે તેને કંઈક ગરબડ હોવાની શંકા ગઈ.

કેબ ડ્રાઈવર પાસેથી મોટરસાઈકલ માંગી

હરિશંકરના જણાવ્યા પ્રમાણે, બાદમાં સ્વતંત્રે ‘પાંચ મિનિટમાં પાછો આવું છું’ કહીને મોટરસાઈકલ માંગી હતી. બપોરે લગભગ 2 વાગ્યે દિલ્હી ક્રાઈમ બ્રાન્ચની ટીમ ત્યાં પહોંચી હતી. પોલીસે સ્વતંત્રને કહ્યું, “અમે ક્રાઈમ બ્રાન્ચમાંથી છીએ, સ્વતંત્ર અમારી સાથે ચાલો.” ત્યારબાદ ટીમ તેને પોતાની સાથે લઈ ગઈ. આ પછી જ હરિશંકરને ખબર પડી કે સ્વતંત્ર દિલ્હી પોલીસના એક ગુનાહિત કેસમાં વોન્ટેડ હતો.

સ્થાનિક પોલીસને પણ મોડેથી માહિતી મળી

બુલંદશહરના સ્થાનિક લોકોએ જણાવ્યું કે સાદા કપડાંમાં આવેલી દિલ્હી પોલીસની ટીમે સ્વતંત્રને ધમેડા નરા ગામ પાસે પકડી લીધો હતો. બીજી તરફ, સિકંદરાબાદના CO દીપક કુમારે જણાવ્યું કે સોશિયલ મીડિયા દ્વારા સ્થાનિક પોલીસને સ્વતંત્રની હાજરીની જાણ થઈ હતી. જોકે સ્થાનિક પોલીસની ટીમ પહોંચે ત્યાં સુધી દિલ્હી પોલીસ તેને પોતાની સાથે લઈ જઈ ચૂકી હતી. 

કોણ છે સ્વતંત્ર ભારદ્વાજ?

સ્વતંત્ર ભારદ્વાજ મૂળ બિહારનો રહેવાસી છે. તે દિલ્હીમાં રહીને અભ્યાસ અને સરકારી નોકરીની તૈયારી કરતો હતો. સોશિયલ મીડિયા પર તે પોતાને ‘સનાતની યોદ્ધા’ તરીકે રજૂ કરે છે. તેના સોશિયલ મીડિયા એકાઉન્ટ્સ પર અનેક ભડકાઉ અને કથિત નફરતભર્યા વીડિયો જોવા મળે છે.

નાબાલિક વિદ્યાર્થીનીએ વ્યક્ત કર્યું દુઃખ

આ મામલે FIR નોંધાવનાર નાબાલિક વિદ્યાર્થીનીએ જણાવ્યું હતું કે હુમલા બાદ તેને અને તેના પરિવારને મૌખિક દુર્વ્યવહાર તથા ધમકીઓ આપવામાં આવી હતી. વિદ્યાર્થીનીએ જણાવ્યું કે ઘટના બાદ તેના માટે ઘરની બહાર નીકળવું પણ મુશ્કેલ બની ગયું હતું. કેટલાક અઠવાડિયા સુધી તે સ્કૂલે પણ જઈ શકી નહોતી, કારણ કે તેને લાગતું હતું કે દરેક વ્યક્તિ તેને જજ કરી રહ્યો છે. હવે તેને આશા છે કે પોલીસ આ મામલે કડક કાર્યવાહી કરશે.

આ પણ વાંચો: Abhijeet Dipkeએ હવે કરી મોટી જાહેરાત, જરૂર પડી તો અમે મુંબઇમાં પણ…