સેન્ટ્રલ દિલ્હીના દેશબંધુ ગુપ્તા રોડ પોલીસ સ્ટેશન વિસ્તારમાં 7 વર્ષની બાળકી સાથે દુષ્કર્મનો ગંભીર મામલો સામે આવ્યો છે. ઘટના બાદ સ્થાનિક લોકોએ 34 વર્ષીય એક વ્યક્તિને પકડી પોલીસને સોંપ્યો હતો. પોલીસે આરોપીને કસ્ટડીમાં લઈ પૂછપરછ શરૂ કરી છે.

કિશનગંજ વિસ્તારમાંથી આરોપી ઝડપાયો

પોલીસના જણાવ્યા મુજબ આરોપીની ઓળખ 34 વર્ષીય અંકિત તરીકે થઈ છે, જે દિલ્હીના કિશનગંજ વિસ્તારનો રહેવાસી હોવાનું જણાવાયું છે. સ્થાનિકોના જણાવ્યા પ્રમાણે બાળકીને કથિત રીતે યૌન શોષણનો ભોગ બનાવતી વખતે આરોપીને પકડી લેવામાં આવ્યો હતો. ત્યારબાદ લોકો તેને બાળકી અને તેના પરિજનો સાથે શિદીપુરા પોલીસ ચોકી લઈ ગયા હતા.

બાળકીની તાત્કાલિક મેડિકલ તપાસ

ઘટનાની જાણ થતાં પોલીસે બાળકીની મેડિકલ તપાસ કરાવી છે. બીજી તરફ આરોપીને પણ મેડિકલ તપાસ માટે મોકલવામાં આવ્યો છે. પોલીસે ઘટનાસ્થળની તપાસ શરૂ કરી છે અને મામલાને લગતા પુરાવા એકત્ર કરવામાં આવી રહ્યા છે.

POCSO સહિતની કલમો હેઠળ કાર્યવાહી

પોલીસ આરોપી વિરુદ્ધ POCSO એક્ટ અને ભારતીય ન્યાય સંહિતા (BNS)ની સંબંધિત કલમો હેઠળ FIR નોંધવાની કાર્યવાહી કરી રહી છે. તપાસ દરમિયાન બાળકીના પરિજનો અને ઘટનાથી જોડાયેલા અન્ય લોકોના નિવેદન લેવામાં આવી રહ્યા છે.

પોલીસ ચોકી બહાર લોકોનો હોબાળો

ઘટનાની જાણ થતાં મોટી સંખ્યામાં સ્થાનિક લોકો પોલીસ ચોકી બહાર એકત્ર થયા હતા. લોકોએ આરોપી સામે કડક કાર્યવાહી કરવાની માગ સાથે નારેબાજી કરી હતી. પરિસ્થિતિને ધ્યાનમાં રાખીને વિસ્તારમાં વધારાનો પોલીસ બંદોબસ્ત ગોઠવવામાં આવ્યો હતો.

વરિષ્ઠ અધિકારીઓ પણ સ્થળે પહોંચ્યા

હોબાળો વધતા સેન્ટ્રલ જિલ્લાના વરિષ્ઠ પોલીસ અધિકારીઓ પણ ઘટનાસ્થળે પહોંચ્યા હતા. પોલીસે લોકોને સમજાવીને શાંત કર્યા હતા. હાલ પરિસ્થિતિ નિયંત્રણમાં હોવાનું જણાવાયું છે, જોકે સાવચેતીના ભાગરૂપે વિસ્તારમાં પોલીસ બંદોબસ્ત યથાવત રાખવામાં આવ્યો છે.  

આ પણ વાંચો    :   Kanpur: Instagramની દોસ્તી પ્રેમમાં બદલાઈ, 3 બાળકોની માતા 25 વર્ષની યુવતી સાથે રહેવા ઘર છોડીને ભાગી