IPL 2027 પહેલાં દિલ્હી કેપિટલ્સે પોતાના કોચિંગ સ્ટાફમાં મોટો ફેરફાર કર્યો છે. ભારતના પૂર્વ લેગ સ્પિનર અમિત મિશ્રાને ટીમના નવા સ્પિન બોલિંગ કોચ બનાવવામાં આવ્યા છે. આ સાથે જ અમિત મિશ્રા પોતાની કોચિંગ કારકિર્દીની શરૂઆત પણ એ જ ફ્રેન્ચાઇઝી સાથે કરશે, જ્યાંથી તેમની IPL સફર શરૂ થઈ હતી. દિલ્હી કેપિટલ્સે 21 ઓક્ટોબરે આ નિમણૂકની જાહેરાત કરી હતી. ટીમે અગાઉ સૌરવ ગાંગુલીને હેડ કોચ બનાવ્યા હતા, જ્યારે યુવરાજ સિંહને આસિસ્ટન્ટ અને બેટિંગ કોચની જવાબદારી સોંપવામાં આવી છે. શ્રીલંકાના પૂર્વ ઝડપી બોલર ચામિંડા વાસ પણ ફાસ્ટ બોલિંગ કોચ તરીકે ટીમ સાથે જોડાયા છે.
‘દિલ્હી મારું દિલ છે’, અમિત મિશ્રાએ શું કહ્યું?
દિલ્હી કેપિટલ્સના સોશિયલ મીડિયા પર શેર કરવામાં આવેલા વીડિયોમાં અમિત મિશ્રાએ પોતાની નવી જવાબદારી અંગે ખુશી વ્યક્ત કરી હતી. તેણે કહ્યું, “મને ખબર નથી કે હું લેજન્ડ છું કે નહીં, પરંતુ IPLમાં મેં સારું પ્રદર્શન કર્યું છે. દિલ્હી દિલવાળાઓની છે.” તેણે આગળ કહ્યું કે IPLની પ્રથમ સિઝનમાં તે દિલ્હી ટીમનો ભાગ હતો અને હવે પોતાની કોચિંગ કારકિર્દીની શરૂઆત પણ આ જ ટીમ સાથે કરી રહ્યો છે. તેણે દિલ્હી કેપિટલ્સના ચાહકોને આગામી સિઝનમાં ખુશી આપવાનો પ્રયાસ કરવાની વાત પણ કરી હતી.
IPLમાં અમિત મિશ્રાના નામે 174 વિકેટ
અમિત મિશ્રા IPLના અનુભવી સ્પિનરોમાં સામેલ છે. તેણે 2008થી 2024 સુધીની IPL કારકિર્દીમાં 162 મેચ રમીને 174 વિકેટ ઝડપી હતી. તેની ઇકોનોમી 7.37 રહી હતી. અમિત મિશ્રાના નામે IPLના ઇતિહાસમાં ત્રણ હેટ્રિક લેવાનો રેકોર્ડ પણ છે. તેણે 2008માં દિલ્હી ડેરડેવિલ્સ, 2011માં ડેક્કન ચાર્જર્સ અને 2013માં સનરાઇઝર્સ હૈદરાબાદ તરફથી રમતી વખતે હેટ્રિક લીધી હતી. IPLમાં ત્રણ હેટ્રિક લેનાર તે એકમાત્ર બોલર છે. અમિત મિશ્રાએ ભારત માટે પણ ત્રણેય ફોર્મેટમાં ક્રિકેટ રમી છે. તેણે 22 ટેસ્ટ, 36 વનડે અને 10 T20 આંતરરાષ્ટ્રીય મેચમાં ભારતનું પ્રતિનિધિત્વ કર્યું હતું. સપ્ટેમ્બર 2025માં તેણે ક્રિકેટના તમામ ફોર્મેટમાંથી નિવૃત્તિ લીધી હતી.
દિલ્હી કેપિટલ્સના કોચિંગ સ્ટાફમાં મોટા ફેરફાર
IPL 2026માં દિલ્હી કેપિટલ્સે 14માંથી 7 મેચ જીતી હતી અને પોઈન્ટ ટેબલમાં છઠ્ઠા સ્થાને રહી હતી. ટીમ પ્લેઓફમાં સ્થાન મેળવી શકી નહોતી. હવે IPL 2027 પહેલાં ફ્રેન્ચાઇઝીએ કોચિંગ સ્ટાફમાં ફેરફાર કરીને નવી તૈયારી શરૂ કરી છે. સૌરવ ગાંગુલી હેડ કોચ, યુવરાજ સિંહ આસિસ્ટન્ટ અને બેટિંગ કોચ, ચામિંડા વાસ ફાસ્ટ બોલિંગ કોચ અને અમિત મિશ્રા સ્પિન બોલિંગ કોચ તરીકે ટીમ સાથે જોડાયા છે.
અમિત મિશ્રાનો અનુભવ દિલ્હી કેપિટલ્સના યુવા સ્પિનરો માટે ઉપયોગી બની શકે છે. ખાસ કરીને સ્પિનર ઝીશાન અંસારી અને અન્ય યુવા બોલરોને તેમની પાસેથી ઘણું શીખવાની તક મળશે. હવે જોવાનું એ રહેશે કે નવા કોચિંગ સ્ટાફ સાથે દિલ્હી કેપિટલ્સ IPL 2027માં કેવું પ્રદર્શન કરે છે.